Адным з першых у раёне ўключыўся ў касавіцу ААТ “Агракамбінат Бабруйскі”. Яно і зразумела: травастой гаспадарцы трэба ўбраць на плошчы каля 4000 гектараў.

У гэтыя дні вядзецца касьба азімага ўкоснага жыта ў сумясі з сурэпіцай, пад якія было занята 450 гектараў. 190 з іх, па словах галоўнага агранома ААТ Сяргея Іванавіча Гаўрыленкі, ужо ўбрана. Пераважную частку атрыманай зялёнай масы (прыкладна 290 тон), прымяніўшы перадавую тэхналогію, завярнулі ў плёнку — у гэтых мэтах працуе прэс-падборшчык. Іншае выкарысталі ў якасці зялёнай падкормкі жывёле. На падыходзе — шматлетнія травы.

Пабываўшы на сенажаці непадалёк в. Баранавічы, мы паназіралі за зладжанай работай касілкі і грабель. Кіравалі кормаўборачнай тэхнікай вопытныя механізатары Аляксандр Іванавіч Цацура і Канстанцін Яўгенавіч Шашкоў.  

Не абыйшлося на залітай сонцам сенажаці без бусла. Нетаропка і важна шпацыруючы вакол машын, птушка, здавалася, інспектаруе працу людзей. 

  Алена КАРПЕНКА. Фота Віктара ШЭЙКІНА.