Планёрка ў райвыканкаме, якую ў гэты панядзелак правёў старшыня раённага выканаўчага камітэта Міхаіл Шалкоўскі, пачалася менавіта з абмеркавання пытанняў, звязаных з выкананнем сельгаспрадпрыемствамі задання па продажы хлеба дзяржаве. У гэтым плане, — як заўважыў кіраўнік раёна, неабходна актывізавацца ўсім гаспадаркам і, у першую чаргу, Бабруйскаму ААТ “Аграмашсервіс”, дзе паказчык на канец тыдня быў адным з найніжэйшых (аб прычынах апошняга і планах па выпраўленні сітуацыі далажыў на планёрцы дырэктар ААТ Сяргей Свірко).

Завастраючы ўвагу на ходзе ўборачных работ, першы намеснік старшыні райвыканкама, начальнік райсельгасхарчу Валерый Сяргейчык адзначыў, што ў раёне вядзецца ўвесь комплекс запланаваных на гэты час работ. Працягваецца ўборка зерневых і зернебабовых культур, прыступілі да ўборкі піваваранага ячменю. Убіраецца гародніна: капуста, морква, цыбуля, а таксама бульба. Апошняй выкапана больш за 20 працэнтаў плошчаў пры сярэдняй ураджайнасці клубняў 226 ц/га. Тэхніка на ўборачных работах, як адзначыў Валерый Сяргейчык, працуе зладжана. Паломкі ў тых з камбайнаў, што часова не працуюць, нязначныя, неабходныя работы па іх рамонце вядуцца.

Тамара Рудая, намеснік старшыні райвыканкама, яшчэ раз нагадала кіраўнікам арганізацый аб даручэнні губернатара вобласці Пятра Рудніка — выплаціць заработную плату за ліпень у два этапы: да 15 і да 25 жніўня. Такая мера, па яе словах, накіравана на якасную падрыхтоўку школьнікаў да новага навучальнага года. Пры гэтым было адзначана, што райспажыўтаварыствам гандлёвая надбаўка на школьны асартымент зніжана з 30 да 20 працэнтаў. 

З улікам таго, што многія з жыхароў населеных пунктаў, якія  размешчаны паўз галоўных аўтадарог раёна, прапаноўваюць садавіну і гародніну аўтамабілістам, была звернута ўвага на неабходнасць тэрміновага ўсталявання паўз шашы (Вішнёўскі і Слабадкоўскі сельскія саветы) спецыяльных месцаў продажу, якія б адпавядалі санітарным патрабаванням і не стваралі перашкоды дарожнаму руху. 

Аб рабоце, накіраванай на падрыхтоўку народнай гаспадаркі раёна да ацяпляльнага сезона, далажыў на планёрцы намеснік старшыні райвыканкама Ігар Кісель. У прыватнасці, было адзначана, што на мінулым тыдні ход падрыхтоўкі абмяркоўваўся на нарадзе камісіі па падрыхтоўцы да зімы. 10 з 40 цеплакрыніц (25 працэнтаў ад агульнай колькасці) ужо маюць пашпарты гатоўнасці. Усе астатнія павінны іх атрымаць, згодна графіка, да канца верасня. Што тычыцца нарыхтоўкі мясцовых відаў паліва, то работы ў гэтым плане УКП «Жылкамунгас» інтэнсіўна вядуцца.

Не губляюць вастрыні пытанні добраўпарадкавання і навядзення чысціні на зямлі. Як паведаміў Ігар Кісель, на мінулым тыдні камісіяй па добраўпарадкаванні райвыканкама з гэтай мэтай былі абследаваны населеныя пункты трох сельскіх саветаў, выдадзена больш за 80 прадпісанняў грамадзянам на ліквідацыю пагрэшнасцяў, у асноўным — нездавальняючую абкоску тэрыторый або яе адсутнасць. Пры гэтым, Міхаіл Шалкоўскі звярнуў увагу і на няякасную абкоску шэрагу дарог, парэкамендаваўшы дарожнікам трымаць гэтае пытанне на асобным кантролі. Не паслабляць увагі да навядзення парадку ў населеных пунктах рэкамендавана таксама і старшыням сельсаветаў.

 Алена КАРПЕНКА.