У склад раённай арганізацыі рэспубліканскага грамадскага а’яднання “Белая Русь” улілася пярвічная арганізацыя, створаная на базе дзяржаўнай установы сацыяльнага абслугоўвання “Каменскі псіханеўралагічны дом-інтэрнат для састарэлых і інвалідаў”. Пярвічка на сёння — адна з найбольш буйных у раёне: яе членамі сталі звыш 60-ці работнікаў установы.

Сёння прайшоў агульны сход членаў РГА “Белая Русь” па пытанні стварэння пярвічнай арганізацыі ў дадзенай сацыяльнай установе. Па пытанні было прынята станоўчае рашэнне. Сход абраў Савет і кантрольна-рэвізійную камісію пярвічкі.

— Мэты і задачы рэспубліканскага грамадскага аб’яднання “Белая Русь”, у тым ліку Бабруйскай раённай арганізацыі, — пабудова незалежнай, моцнай і квітнеючай Беларусі, сацыяльна справядлівага грамадства, у якім кожны грамадзянін адчувае сябе вольнай, самадастатковай, незалежнай асобай, чые здольнасці цалкам рэалізуюцца, — адзначыў галоўны спецыяліст аддзела ідэалагічнай работы і па справах моладзі райвыканкама-член Савета Бабруйскай раённай арганізацыі РГА “Белая Русь” Сяргей Сарокін, віншуючы работнікаў Каменскага дома-інтэрната са стварэннем пярвічкі. А разам і з далучэннем, як заўважыла Таццяна Плоская, намеснік дырэктара сацыяльнай установы, да актыўнага грамадскага жыцця.  

Алена КАРПЕНКА. Фота аўтара.