Раз на тыдзень супрацоўнікі аддзела эканомікі Бабруйскага райвыканкама сумесна з дэпутатамі раённага Савета дэпутатаў (а старшыні сельвыканкамаў і штодня) ажыццяўляюць маніторынг гандлёвых аб’ектаў усіх форм уласнасці на сяле.

Увагу найперш скіроўваюць на насычанасць магазінаў таварамі, а таксама на выкананне гандлёвага, санітарна-эпідэміялагічнага заканадаўства і заканадаўства аб цэнаўтварэнні. Пад прыцэлам кантралюючых службаў у тым ліку наяўнасць хлеба і хлебабулачных вырабаў у сельскіх гандлёвых аб’ектах.

У выпадку выяўлення невыканання заканадаўства, як патлумачыла галоўны спецыяліст аддзела эканомікі райвыканкама Вольга Голуб, суб’ектам гандлю накіроўваюцца рэкамендацыі аб пазбаўленні ад выяўленых парушэнняў ва ўстаноўленыя тэрміны.