Урачыстасць з нагоды прафесійнага свята людзей, якія звязалі сваё жыццё з сельскай гаспадаркай, вытворчасцю і перапрацоўкай сельгаспрадукцыі — яго ў Беларусі адзначаць 19 лістапада — прайшла сёння ў раённым Цэнтры культуры. 

Віншуючы працаўнікоў палёў і ферм, усіх датычных да аграрнай галіны з надыходзячым святам, старшыня Бабруйскага райвыканкама Аляксандр Сухадольскі заакцэнтаваў увагу на значнасці сельскагаспадарчых прафесій, падзякаваў калектывам за добрасумленную працу на карысць краіны, адзначыў унёсак раёна, сельгаспрадпрыемстваў і работнікаў АПК узнагародамі Магілёўскага абласнога і Бабруйскага раённага выканаўчых камітэтаў.

Так, па выніках абласнога спаборніцтва за дасягненне найлепшых паказчыкаў у развіцці аграпрамысловага комплексу за 2022 год Бабруйскі раён удастоены Ганаровага дыплома Магілёўскага аблвыканкама 1 ступені (заняў 1 месца сярод раёнаў вобласці ў намінацыі “Вытворчасць бульбы”) і 2 ступені (заняў 2 месца ў намінацыі “Вытворчасць і продаж малака”) — узнагароды ўручаны першаму намесніку старшыні райвыканкама-начальніку ўпраўлення па сельскай гаспадарцы і харчаванні Аляксею Жураўлёву.

Ганаровых дыпломаў аблвыканкама 1 ступені ўдастоены:

СВК “Гігант” (старшыня Васіль Жук) — за 1 месца ў намінацыі “Эканамічная эфектыўнасць сельскагаспадарчай вытворчасці”.

Філіял “Варатынь” ААТ “Бабруйскі завод ТДіА” (кіраўнік Уладзімір Давыдзенка) — за 1 месца ў намінацыі “Вытворчасць і продаж малака”.

Ганаровага дыплома 3 ступені — ААТ “Неўскі-Агра” (дырэктар Міхаіл Стрыжэўскі) — за 3 месца ў намінацыі “Вытворчасць бульбы”.

Віншаванні з нагоды свята і пажаданні плённай працы работнікам аграрнай галіны выказалі таксама першы намеснік старшыні райвыканкама Аляксей Жураўлёў, старшыня райкама прафсаюза работнікаў аграпрамысловага комплексу Надзея Дудаль і старшыня Маладзёжнага парламента пры Бабруйскім райсавеце дэпутатаў Анастасія Гацко. З іх рук работнікі сельскай гаспадаркі, чые працоўныя поспехі вартыя быць адзначанымі, атрымалі граматы, лісты ўдзячнасці, грашовыя прэміі і падарункі.

Сапраўдным святам для людзей, якія прысвяцілі сябе служэнню зямлі, забеспячэнню харчовай бяспекі краіны, стаў і цудоўны канцэрт ад артыстаў і творчых калектываў раёна.  

Алена КАРПЕНКА. Фота Віктара ШЭЙКІНА.