Колькі дзён таму мы сталі сведкамі маштабнасці корманарыхтоўкі ў ААТ “Неўскі-Агра”. На полі за вёскай Постраш рупіўся механізаваны атрад з болей за дзясятак адзінак тэхнікі, сярод якой тры корма­ўборачныя камбайны для здрабнення і падборкі зялёнай масы, у тым ліку два КВК-800 і КГ-6, а таксама касілка КМР-6, граблі ГРЛ-9,6 і 10 перавозчыкаў: МАЗаў і розных відаў трактараў з прычэпамі.

Трамбоўка травяной масы — закладка траншэі вялася на комплексе “Акцябр” — ажыццяўлялася трактарамі “Амкадор” і МТЗ-3522. Уначы трамбоўка не спыняецца, “Амкадор” працягвае працаваць: тэхналагічнасць працэсу не дазваляе дапускаць перапынку ў гэтай справе.

“Рыхтуем корм з траў як першага, так і другога ўкосаў, — кажа галоўны аграном гаспадаркі Аляксандр Іванавіч Мельнік. — Сёння, да прыкладу, вядзем работы на нізінных няўдобіцах, куды не кожны год заходзіла тэхніка і сёлета было праб­лематычна”.
— Імкнемся ўбраць усё, што дзе вырасла, каб быць з кормам і разлічваць на нарошчванне жывёлагадоўчай прадукцыі, — удакладняе дырэктар ААТ “Неўскі-Агра” Міхаіл Мікалаевіч Стрыжэўскі.
У цэлым нарыхтоўка сенажу ў гаспадарцы блізіцца да завяршэння. Да запланаваных 14 з гакам тысяч тон гэтага віду корму на дзень нашага наведвання (30 чэрвеня) недаставала прыкладна паўтары тысячы. Між тым ужо наступаюць на пяткі, як заўважыў Міхаіл Стрыжэўскі, жніво і звязаныя з ім падрыхтоўчыя работы, а таксама клопаты па пераводу жывёлагадоўлі на зімне-стойлавы перыяд. Пакідаць “на пасля” гэтыя работы ў “Неўскім-Агра” не збіраюцца, кіруюцца народнай мудрасцю — рыхтуй сані летам. У гэтым плане на малочна-таварнай ферме “Туркоўская Слабада”, як было адзначана, заканчваецца рамонт сістэмы вадапаення і падлогі — кармавыя сталы ўжо адрамантаваны. “Неабходна таксама завяр­шыць падрыхтоўку хлява на комплексе буйной рагатай жывёлы, дзе работы засталося працэнтаў дваццаць, — кажа дырэктар. — Да жніва разам з іншым рыхтуем сушыльную гаспадарку. Не за гарамі ўборка азімых ячменю, рапсу — трэба быць гатовымі”.
З цеплынёй адгукваюцца ў сельгасарганізацыі пра работнікаў палёў, тых, хто на перадавой корманарыхтоўкі, а неўзабаве і — уборкі хлябоў. На сенажацях у гэты дзень мы засталі правераных часам камбайнераў Аркадзя Аркадзьевіча Алісеенку, Івана Алегавіча Паслядовіча, Івана Уладзіміравіча Макеева, маладога і спрытнага ў рабоце Міхаіла Сяргеевіча Якаўлева. На валкаванні травы — Фёдара Кірылавіча Дзяменцьева. Касіў няўдобіцу вопытны механізатар Валерый Васільевіч Вавула. На перавозцы зялёнай масы ў траншэю рупіліся механізатары і вадзіцелі Васіль Спірыдонавіч Кушавараў, Вячаслаў Васільевіч Балыка, Сяргей Анатольевіч Кафідаў, Андрэй Віктаравіч Мяцеліца. Трамбоўку ажыццяўлялі Сяргей Рыгоравіч Стэльмак і Юрый Яўгенавіч Арцёменка, уначы гэты абавязак ускла­дзе на сябе Аляксей Вячаслававіч Дрыкін.
“Ніхто з нашых механізатараў і вадзіцеляў увагай не абдзелены, — кажа дырэктар. — Трэба выхадны — даем выхадны. Ёсць неабходнасць — ставім падменнага, неабходнасці няма — тэхніка пастаіць. Стараемся людзей берагчы”.

Алена КАРПЕНКА. Фота аўтара і Юрыя ЮРКЕВІЧА.