Цікавае і захапляльнае мерапрыемства “Летняе падарожжа ў краіну здароўя”, прымеркаванае да Міжнароднага дня абароны дзяцей, у рамках рэспубліканскай акцыі “Клопат” наладзілі сёння школьнікам малодшых і сярэдніх класаў Туголіцкай СШ  работнікі Бабруйскай гарадской паліклінікі №2 сумесна з пярвічнай арганізацыяй РГА “Беларускі саюз жанчын” і прафсаюзнай пярвічкай медустановы.  

У даходлівай форме, пасродкам розных гульняў — флэшмоба, віктарыны, адгадвання загадак медыцынскія работнікі: памочнік урача Вольга Казека, інструктар-валеолаг БГП№2 Ларыса Колесава, медыцынская сястра афтальмалагічнага кабінета Таццяна Белакурская і медстатыстык Ірына Жураўлёва расказалі хлопчыкам і дзяўчынкам пра значнасць, асабліва ў іх узросце, здаровага харчавання і фізкультуры. Інжынер па ахове працы Алег Сямёнаў, ён жа — персанаж “Бабёр”,  нагадаў падлеткам меры бяспекі ля вадаёмаў і ў вадзе, галоўная з якіх — не наведваць вадаёмы без дарослых. Засяродзілі ўвагу медыкі таксама і на іншых важных правілах бяспечнай жыццядзейнасці.  

Мерапрыемства атрымалася, нягледзячы на сур’ёзнасць тэматыкі, вясёлым і радасным, сугучным настрою дзяцей. І таму што пачаліся доўгачаканыя летнія канікулы, і таму што разам з зарадам пазітыву вучні атрымалі ад гасцей салодкія і не толькі сувеніры.

Алена КАРПЕНКА. Фота аўтара.