Як не стаць ахвярай кіберзлачыннасці? У які час непаўналетнім забаронена з’яўляцца на вуліцы без суправаджэння дарослых? Як дзейнічаць на выпадак пажару ці іншай надзвычайнай сітуацыі? Чаму наркотыкі і алкаголь — зло? Якія наступствы супрацьпраўных паводзін дзяцей? Адказы на гэтыя і іншыя пытанні, дэманструючы засвоеныя веды, давалі падлеткі, якія патрабуюць павышанай увагі, пяці раённых устаноў адукацыі: Каменскай, Туголіцкай, Гарбацэвіцкай, Ленінскай сярэдніх школ і Осаўскай базавай школы падчас раённага прафілактычнага міжведамаснага мерапрыесмтва “Зоны рызыкі”, наладжанага аддзелам адукацыі і камісіяй па справах непаўналетніх райвыканкама пры ўдзеле РАУС, Бабруйскага гаррайаддзела па НС, пракуратуры, філіяла “Бабруйскі наркалагічны дыспансер”.

У гульнёвай, захапляльнай форме хлопчыкі адказвалі на сур’ёзныя пытанні — спаборнічалі за права называцца самай дасведчанай камандай.

У выніку пераможцамі, як адзначыла метадыст раённага метадычнага кабінета Вікторыя Шунько, сталі ўсе, бо не толькі прадэманстравалі свае, але і прыдбалі новыя веды. Аднак найбольшую суму балаў па выніку пераадольвання пяці зон рызыкі (“зона здароўя”, “зона бяспекі”, “зона закону”, “зона адказнасці” і “зона разумення”) набрала каманда Каменскай сярэдняй школы. Яна, а таксама іншыя каманды-удзельніцы, ўдастоены дыпломаў аддзела па адукацыі, КСН Бабруйскага райвыканкама і салодкіх прызоў.

Водгукі пра мерапрыемства і свой удзел у ім вучні далі самыя цёплыя. Застаецца спадзявацца, што абагуленыя веды прыйдуцца кожнаму на карысць.

Алена КАРПЕНКА. Фота аўтара.