Раённыя «Зажынкі» далі старт уборачнай кампаніі на Бабруйшчыне (+відэа)
На Бабруйшчыне сёння прайшоў абрад “Зажынкі” . На полі СВК “Гігант”, дзе падыйшлі да ўборкі хлябы, сабраліся прадстаўнікі кіруючага складу раёна на чале са старшынёй Бабруйскага райвыканкама Аляксандрам Сухадольскім, прадстаўнікі духавенства, кіраўнікі, галоўныя спецыялісты і механізатары сельгасарганізацый, мясцовыя жыхары.
Нагадаўшы ўдзельнікам жніва аб значнасці для раёна і краіны ўборачнай кампаніі, Аляксандр Сухадольскі выказаў упэўненасць, што працаўнікі раёна падыдуць да збору зерня, як заўжды, з адказнасцю і сумленнем, убяруць хлябы ў сціснутыя тэрміны і якасна, у каторы раз даказаўшы, што на Бабруйшчыне ўмеюць працаваць, і сёлетні раённы каравай стане прыкметным унёскам у вагу агульнарэспубліканскага.
Сёлета да ўборкі належыць без малога 13 тысяч гектараў збожжавых і зернебабовых культур. Палі выглядаюць ураджайнымі. “Пры добрай рабоце мы абавязкова сустрэнем зіму з поўнымі засекамі”, — адзначыў Аляксандр Сухадольскі. Таксама ён заўважыў, што стаўка, зробленая ў раёне на азімы ячмень (плошчу пасеваў павялічылі з 75 га да 569), сябе апраўдала — сярэдняя ўраджайнасць дасягнута вышэйшая, чым у мінулым годзе, і склала 45 ц/га.
Кіраўнік раёна падзякаваў усім — асабліва механізатарам — хто не пакладаючы рук, не лічачыся з часам, працуе на палях дзеля дабрабыту гаспадаркі і краіны і нагадаў словы Прэзідэнта Беларусі адносна таго, што сітуацыя, якая склалася на харчовым рынку — гэта шанец добра зарабіць. Таму сёлетняя ўборачная кампанія абавязкова павінна прайсці на высокім узроўні арганізаванасці і дысцыпліны.
Падхапіўшы падкінуты снапок з калосся новага ўраджаю, сабраны жнейкамі па традыцыі ўручную, старшыня райвыканкама абвясціў тым самым старт масавага жніва. Гонар вывесці камбайны на хлебную ніву, абмалаціць першае калоссе даручылі лепшым экіпажам зернеўборачных камбайнаў “Гіганта”: Алегу Вяроўкіну і Максіму Быкаву, Мікалаю Зубу і Яўгену Іванову, Сяргею Камлёву і Сяргею Мерадаву, Віктару Балыку і Анатолю Ліпніцкаму.
Перш чым машыны рушылі ў поле, старшыня райкама прафсаюза работнікаў АПК Надзея Дудаль ад галіновага прафсаюза і раённай арганізацыі Чырвонага Крыжа ўручыла камбайнерам аптэчкі, пратаіерэй Генадзь Вейга, благачынны Бабруйска-Глускай акругі, блаславіў людзей і тэхніку на зладжаную работу і багаты ўраджай, пажадаў усім вытрымкі і здароўя. Спрыяльнага надвор’я, плённай працы і добрага ўраджаю пажадалі земляробам старшыня райсавета дэпутатаў Геворг Мелканян і старшыня СВК “Гігант” Васіль Жук. Раённыя артысты, як заўжды, задалі “Зажынкам” святочна-урачысты настрой.
***
Прэзідэнт краіны Аляксандр Лукашэнка сёння правёў селектарную нараду, галоўнай тэмай якой стала гатоўнасць рэгіёнаў да ўборачнай кампаніі, у прыватнасці, гатоўнасць тэхнікі. Як да збору ўраджаю зерня падрыхтаваны Бабруйскі раён, мы папрасілі пракаментаваць старшыню райвыканкама Аляксандра Сухадольскага:
— Задача, якая была пастаўлена Прэзідэнтам — убраць збажыну раней, каб на ўсё хапіла часу. У агульным жа ў нас машынна-трактарны парк, за выключэннем двух камбайнаў, дзе меліся праблемы “глыбокага характару”, гатовы, сушыльная гаспадарка падрыхтавана, механізатарамі раён укамплектаваны, пытанні харчавання, аховы працы людзей на жніве вырашаны, наладжана ў гэтым плане ўзаемадзеянне з Бабруйскім гаррайаддзелам па надзвычайных сітуацыях. І галоўнае — на палях ёсць хлеб. Тая асноўная задача, што паставіў сёння Аляксандр Лукашэнка — і я з ім салідарны — якасна ўбраць ураджай, даведзена да земляробаў нашага раёна. Людзі разумеюць — тэмпы павінны быць, але тэмпы якасныя, якасць уборкі найперш.
Алена КАРПЕНКА. Фота Юрыя ЮРКЕВІЧА.
