«Карусель» у Туголіцы
Часта можна сустрэць, што тая ці іншая справа, тое ці іншае захапленне становяцца сямейнымі: дачка вучыцца ад маці ткаць, вышываць, сын пераймае вопыт і майстэрства бацькі ў ганчарстве, разьбе па дрэве, пляценні з лазы і гэтак далей. А што да песеннай творчасці, то тут і казаць няма чаго. Якая дзяўчынка не марыць стаяць на сцэне, як маці?
Сабраць усіх, для каго любімая справа з’яўляецца яшчэ і справай сямейнай, паставілі сабе за мэту работнікі аддзела культуры, арганізатары раённага фестывалю сямейнай творчасці “Карусель”.
Вера Гайшун (злева) дэманстравала тканыя покрыўкі
Анатоль Прыгара з сынам прывезлі на свята вырабы з лазы
і выкананыя разьбой па дрэве сувеніры
Вядомая на Бабруйшчыне песенніца Зінаіда Какоўка
Сямейны дуэт Ніны Абрамавай і Міхаіла Мацвяёнка
Брат і сястра Канстанцін Кавалевіч і Таісія Калоша
У суботу 26 чэрвеня, у пасёлак Туголіца з’ехаліся сямейныя калектывы выканаўцаў і народных умельцаў са шматлікіх населеных пунктаў раёна. Анатоль Прыгара з сынам Паўлам з Гарохаўкі прывезлі на свята вырабы з лазы і выкананыя разьбой па дрэве сувеніры. Стрыечныя сёстры Вера Гайшун і Ірына Бузак, зноў жа з Гарохаўкі, дэманстравалі тканыя покрыўкі сваіх маці і цёткі. Жанчыны з захапленнем дзяліліся сакрэтамі ткацкай справы, адчувалася, што і самі неаднойчы сядзелі за кроснамі. Міхалёўскія і кавалёўскія ўмельцы па бісерапляценні Іна і Вераніка Шырокія, Марына і Анастасія Дзешкавец прыехалі на фестываль з цікавымі і непаўторнымі працамі, якія прываблівалі не толькі разнастайнасцю фарбаў, але і мудрагелістымі формамі. Людміла і Святлана Вяроўкіны з Міхалёва парадавалі прысутных вышытымі крыжыкам карцінамі: пейзажамі, нацюрмортамі, абразамі. Майстэрства вышыўкі і вязання дэманстравала на фестывалі і Раіса Мазурэнка з Бортнікаў.
Адкрыла фестываль, на правах гаспадыні туголіцкай зямлі, вядомая на Бабруйшчыне песенніца Зінаіда Какоўка. Яе магутны, нягледзячы на немаладыя гады, і звонкі голас падчас выканання народных песень разносіўся па ўсёй Туголіцы. На яго збіраліся да пасялковага ДК і старыя і малыя.
Далей эстафету перанялі сямейныя калектывы вёскі Каменка. Сваёй творчасцю парадавалі прысутных сямейныя дуэты Ніны Абрамавай і Міхаіла Мацвяёнка; Наталлі Амос і Алены Бодык, Канстанціна Кавалевіча і Таісіі Калошы, якія выканалі песні пад суправаджэнне гітары, а таксама Аляксандр Булацкі, Вадзім Ваншукевіч і Яўгенія Юшкевіч.
Наступнымі дэманстравалі сваё майстэрства бортнікаўскія выканаўцы: Ганна і Марына Зубрыкавы, Марына Кліш, якім акампаніраваў Васіль Невядомскі. Бярэзавіцкі Дом культуры прадстаўляў сямейны калектыў Нікіфаравец: Яўгенія, Жана і Вікторыя, а таксама Раіса Гайшун, Таццяна Баравая, Аляксандр Зайчанка. З усмешкамі на тварах віталі туголіцкую зямлю выканаўцы народных песень з Рэдкарожскага Дома культуры: сямейны дуэт Валянціны і Кацярыны Нікітка, а таксама Надзеі, Таццяны і Вольгі Урублеўскіх. Гучалі на фестывалі песні і ў выкананні Васіля і Алены Пашкевічаў з Міхалёва, Тамары Аляксеевай, Таццяны Федулавай, Марыі Фраловай — з вёскі Сычкава, Крысціны і веранікі Кавальчук — з Кавалёў.
Не абыйшлося на фестывалі без конкурсаў, гульняў, і, вядома ж, уручэння дыпломаў і падарункаў яго ўдзельнікам.
Трэба адзначыць, што сёлета фестываль сямейнай творчасці «Карусель» ладзіўся ўпершыню, аднак яго арганізатары спадзяюцца на тое, што яго правядзенне стане ў раёне добрай традыцыяй.
Алена КАРПЕНКА.
Фота Алены БРАІЛІЦЫ.