У Бабруйскім раёне падвялі вынікі работы жывёлагадоўлі за квартал
Пасяджэнне з гэтай нагоды адбылося на базе філіяла “Варатынь” ААТ “Бабруйскі завод ТДіА” з удзелам старшыні райвыканкама Аляксандра Сухадольскага.
“Па выніках квартала дасягнуты паказчыкі і годныя, і тыя, над якімі трэба працаваць, — адзначыў першы намеснік старшыні, начальнік упраўлення па сельскай гаспадарцы і харчаванні Аляксей Жураўлёў, нацэльваючы кіраўнікоў, галоўных спецыялістаў галіны, загадчыкаў ферм на плённую працу.
З лічбамі вытворчасці малака і мяса за справаздачны перыяд пазнаёміў намеснік начальніка райсельгасхарчу па жывёлагадоўлі Аляксандр Кісялёў. За студзень-сакавік, як ён адзначыў, вытворчасць малака ў раёне склала 9878 тон або 102,7% да адпаведнага перыяду мінулага года; таварнасць малака — 91% (+1%); удой малака на адну карову за тры месяцы склаў 1123 кг (+31 кг); вытворчасць мяса — 777 т ці 100,5%. У дапаўненне выступілі, засяродзіўшы ўвагу на праблемах па ўзнаўленні статку, начальнік Бабруйскага філіяла РУСПП “Магілёўскае дзяржплемпрадпрыемства” Раіса Кавалёва і галоўны ветэрынарны ўрач раёна Андрэй Аляксееў. Кіраўнікі сельгасарганізацый, дзе дапушчана невыкананне вытворчых заданняў, далажылі аб прычынах апошняга і спосабах, здольных сітуацыю выправіць.
На малочна-таварнай ферме №1 “Варатынь”, дзе ўдой на карову 23 кг у дзень, удзельнікі пасяджэння пазнаёміліся з працэсам выпайкі нованароджаных цялят малозівам і кантролем за гэтым, вакцынацыяй жывёлы, з укаранёнай на МТФ тэхналогіяй запарвання зерня для дойнага статку. На малочна-таварным комплексе — з прагрэсіўным спосабам утрымання маладняку (нядаўна для гэтых мэт у гаспадарцы ўзвялі сучасны арачнік).
— Першым кварталам не сказаць каб задаволены. Выхад з зімоўкі не зусім просты: не ва ўсіх дастае корму. Трэба сёлета ўзмоцнена папрацаваць над кармавой базай — тыя кармы, што ёсць, не той якасці, як хацелася б. Ды і варта пашыраць плошчы, уводзіць новыя землі. Тым не менш, мы ў цэлым ідзем па малаку “з плюсам”. Не з тым, на які разлічвалі, ставілі задачу, толькі 103 працэнты. Але па навацельнай жывёле ў плюсе трыста галоў — так што ёсць каго даіць. Цяпер задача — падшліфаваць тэхналогію. Па вытворчасці мяса за апошні месяц хоць “змінусавалі”, у цэлым жа — на ўзроўні мінулага года. Станоўчыя зрухі па захаванасці маладняку, хоць і ёсць недапрацоўкі — таксама патрабуецца строгае выкананне тэхналогіі. Так што будзем працаваць. І тут галоўнае — гарэць справай, якой займаешся, найперш — кіраўнікам, тады абавязкова ўсё атрымаецца, — адзначыў, акцэнтуючы ўвагу на задачах галіны, Аляксандр Сухадольскі. Кіраўнік раёна выказаў сельгасвытворцам словы падзякі за годную работу ў мінулым годзе. Па выніках 2021-га Бабруйскі раён па тэмпах росту вытворчасці прадукцыі жывёлагадоўлі выйшаў на другое месца ў вобласці.
Алена КАРПЕНКА. Фота аўтара.