У Бабруйскім раёне поўным ходам ідзе касьба траў першым укосам і нарыхтоўка сакавітага корму для патрэб жывёлагадоўлі.

— Трава сёлета нарасла добрая, таму будзем з кормам. Дажджы крыху замінаюць уборцы, але ў сельгаспрадпрыемствах выкарыстоўваюць кожную пагодлівую хвіліну для гэтага, — кажа начальнік вытворча-эканамічнага аддзела ўпраўлення па сельскай гаспадарцы і харчаванні  райвыканкама Віктар Садоўскі.

Па стане на раніцу сённяшняга дня, як ён паведаміў, у раёне скошана 6 тысяч гектараў сенажацяў, гэта больш за палову ад плана касьбы першым укосам. У цэлым нарыхтавана звыш 32 300 тон (25% ад неабходнага аб’ёму) сенажу, 165 тон (5%) сена і 1800 тон сіласу — 5,2 ц к. адз. на адну ўмоўную галаву жывёлы (годам раней на гэтую пару было 2,7 ц к. адз.).

Ярына ў раёне пасеяна і цяпер увага скіравана на догляд раслін — у асноўным вядуцца хімпраполкі кукурузы.

І, вядома ж, раён актыўна рыхтуецца да жніва, уборкі каласавых культур. На кантролі рамонт адпаведнай сельгастэхнікі, правядзенне яе тэхнічнага абслугоўвання, правядзенне тэхаглядаў, падрыхтоўка складскіх памяшканняў да прыёмкі ўраджаю хлябоў.

Алена КАРПЕНКА.