Пасяджэнне чарговай пастаянна дзеючай раённай камісіі па кантролі за садзеяннем занятасці насельніцтва працавала сёння ў аддзеле ўнутраных спраў Бабруйскага райвыканкама.

Традыцыйна на камісію, якая праходзіць у сценах РАУС, прыйшлі тыя, хто працяглы або кароткі тэрмін не працуе ці працуе не афіцыйна і пры гэтым значыцца ў міліцыі як парушальнік грамадскага парадку.

На пасяджэнне з’явілася больш за 20 чалавек, пераважна — мужчыны, у тым ліку моладзь і людзі перадпенсійнага ўзросту. Тлумачэнні, чаму апынуліся без працы, прыводзілі розныя: змяніў месца жыхарства, адсутнічаюць вакансіі па месцы пражывання, вось-вось пачну працоўную дзейнасць, праходжу медкамісію, працую ў прыватніка без афіцыйнага афармлення, працую ў Расіі, нядаўна аформіў занятасць, не маю фізічнага здароўя і г.д.

З кожным наведвальнікам члены камісіі правялі шырокую тлумачальную работу — папярэдзілі пра наступствы ад бяздзеянняў у дачыненні працаўладкавання, у тым ліку аб недастатковасці працоўнага стажу пры дасягненні грамадзянінам пенсійнага ўзросту, аб нізкім узроўні жыцця, дрэнным прыкладзе для дзяцей, маральнай адказнасці перад грамадствам за няўдзел у напаўненні дзяржаўнага бюджэту. А разам і прапанавалі вакансіі са спісу тых, што маюцца на сёння ў арганізацыях Бабруйскага раёна, у тым ліку сельгасарганізацыях, і гарадскіх. Работнікі РАУС у сваю чаргу правялі з грамадзянамі прафілактычную размову аб наступствах асацыяльнага ладу жыцця: злоўжывання спіртнымі напоямі, парушэння грамадскага парадку, сямейнага насілля.

Застаецца спадзявацца, што кампетэнтнымі парадамі членаў камісіі, падмацаванымі накірункамі да канкрэтнага наймальніка, грамадзяне скарыстаюцца і палепшаць уласны і краіны дабрабыт.   

Тэкст і фота Алены КАРПЕНКА.