Дзяржаўныя сімвалы Беларусі — адлюстраванне велічы і прыгажосці роднай зямлі, пераемнасці гістарычных традыцый і непарыўнай сувязі мінулага, сучаснасці і будучыні краіны, мірнага, стваральнага характару беларусаў. З гэтымі сімваламі мы ўпэўнена ідзем наперад да агульнай мэты — пабудовы моцнай і квітнеючай Беларусі. Задача кожнага дарослага расказаць і данесці сваім прыкладам дзецям шчырыя пачуцці да сімвалаў нашай краіны.

Вучні Каменскай спецыяльнай школы-інтэрната далучыліся да рэспубліканскай акцыі «Ганаруся роднымі сімваламі». Як расказала педагог-арганізатар Вольга Арцёмчык, акцыя прайшла на тэрыторыі школьнага двара. Навучэнцы разгарнулі Дзяржаўны флаг і выканалі беларускі гімн.

***

Мерапрыемства, якое прайшло ў Варатынскім сельскім Доме культуры з юнымі жыхарамі аграгарадка, пачалося з кароткага экскурсу ў гісторыю беларускай сімволікі. Дзеці даведаліся пра значэнне кожнага элемента герба, пра колеры сцяга і пра тое, як гімн адлюстроўвае дух і гісторыю народа. У ходзе размовы хлопцы і дзяўчынкі зрабілі выснову, што трэба заўжды заставацца патрыётамі сваёй краіны. А ведаць дзяржаўныя сімвалы Рэспублікі Беларусь — гэта абавязак кожнага грамадзяніна нашай краіны.
У фае СДК разгарнулася тэматычная выстава, якая стала ўвасабленнем сімвалаў, па якіх сёння ва ўсіх кутках свету даведваюцца пра нашу сінявокую Беларусь.