Касьба травы і закладка сенажу, чым у гэтыя дні заняты ў ААТ “Саўгас Кісялевічы”, вядуцца сёння на двух сенажацях непадалёк в. Баяры.

Галоўны аграном Марына Капорына, якую засталі там жа, патлумачыла, што задача перад сельгаспрадпрыемствам на корманарыхтоўку — закласці 7300 тон сенажу, 7500 тон сіласу і 550 тон сена. Дзеля гэтага першым укосам неабходна скасіць больш за 1400 гектараў сенажацяў. Па стане на раніцу сённяшняга дня, 300 з іх было скошана, на сянаж нарыхтавана 400 тон травяной масы. Першую па ліку траншэю напаўняюць у Баярах.

— Для выканання пастаўленай задачы ў нас ёсць і прафесіянальныя кадры, і тэхнічныя магчымасці, а таксама ўсе неабходныя складнікі для закладкі корму: кансерванты, укрыўны матэрыял, іншае, — кажа Марына Леанідаўна і ўпэўнена пералічвае людзей і машыны, што ў гэтыя дні заняты на ўборцы травы.

Так, касьбу ажыццяўляе Аляксандр Зорын, валкоўку — Уладзімір Міхальчук.  На падборы і здрабненні правяленай масы працуе Аляксандр Курловіч на КВК-800. На перавозцы ўраджаю да траншэй — трактарысты-машыністы Аліхан Кантаеў, Уладзімір Альховік, Аляксандр Рагалевіч, вадзіцелі Алег Дзікі і Анатоль Астаповіч. Трамбоўка будучага сенажу вядзецца круглыя суткі, двума Амкадорамі, кіроўцы цяжкай тэхнікі — Рыгор Зорын і Дзмітрый Каталосаў.

За плячыма ўсіх хлебаробаў, па словах спецыяліста, не адна кормаўборачная кампанія. Вопыт і добрасумленнае стаўленне да працоўных абавязкаў, пацверджаныя гадамі, даюць упэўненасць, што пры садзеянні надвор’я корманарыхтоўка ў гаспадарцы пройдзе якасна: травастой будзе ўбраны ў аптымальныя тэрміны.  

Алена КАРПЕНКА.

Фота Віктара ШЭЙКІНА.