З панядзелка школьнікі адправяцца на традыцыйныя веснавыя канікулы. Сёлета яны пройдуць з 22 да 29 сакавіка.

У Бабруйскім раёне гэтай парой будуць дзейнічаць 8 школьных лагераў дзённага знаходжання, у якіх адпачнуць 165 дзяцей. Для навучэнцаў падрыхтаваны цікавыя праграмы з разнастайных мерапрыемстваў выхаваўчага, пазнавальнага, спартыўнага накірункаў.

У суботу 28 сакавіка на базе Каменскай сярэдняй школы пройдзе раённы этап рэспубліканскага агляду-конкурсу “Юныя інспектары дарожнага руху”. Арганізатары конкурсу — аддзел адукацыі Бабруйскага райвыканкама і аддзел ДАІ Бабруйскага РАУС. Мерапрыемства праводзіцца ў мэтах папярэджання дарожна-транспартных здарэнняў з удзелам дзяцей.

Цэнтральнае месца на канікулах адведзена раённай алімпіядзе па вучэбных прадметах, якая пройдзе на базе Ленінскай сярэдняй школы. Да ўдзелу ў інтэлектуальных спаборніцтвах заяўлена 286 навучэнцаў з 13-ці ўстаноў адукацыі раёна.

Такім чынам, калі для адных школьнікаў веснавыя канікулы — выключна адпачынак, то для іншых — яшчэ і напружаная праца з падручнікам.     

 Алена КАРПЕНКА.