Да 130-годдзя з дня нараджэння Кандрата Крапівы ў бібілятэках раёна прайшлі мерапрыемствы

Адным з выдатнейшых прадстаўнікоў беларускай літаратуры з’яўляецца Кандрат Крапіва, 130-годдзю з дня нараджэння якога прысвяцілі многія мерапрыемствы бібліятэкі раёна.

За сваё доўгае жыццё К. Крапіва зрабіў нямала. Выдатнейшы драматург, аўтарытэтны тэарэтык літаратуры, вучоны-мовазнаўца… Ён і ў паэтычных творах дасягнуў значных поспехаў. Яго сатырычныя вершы і паэмы і сёння нясуць у сабе зарад актуальнасці і непераходнай свежасці. Пісьменнік выкрывае нейкую загану праз смех, што больш дзейсна, чым проста ўказваць на гэтую загану.

У беларускай літаратуры творчая індывідуальнасць народнага пісьменніка Беларусі К. Крапівы ўзвышаецца велічна, непаўторна і ярка. Яго творчасць – цэлая эпоха ў нацыянальнай драматургіі.

Як расказала Жана Канькова, дырэктар цэнтралізаванай бібліятэчнай сеткі раёна, размова аб жыццёвым шляху і творчай дзейнасці Кандрата Крапівы ішла падчас паэтычнай гадзіны “Майстар беларускага слова” у бібліятэцы аграгарадка Варатынь; літаратурнай гадзіны “Кандрат Крапіва: майстар слова” – у бібліятэцы аграгарадка Леніна, літаратурнага падарожжа “Майстар слова – Кандрат Крапіва” – у Вішнёўскай бібліятэцы-клубе, літаратурнай гадзіны “Чытаем Крапіву разам” – у Глушанскай сельскай бібліятэцы, прэзентацыі выставы і агляду твораў “Майстар сатыры: К. Крапіва” – у цэнтральнай бібліятэцы, гучных чытанняў “Смяемся разам з Крапівой” – у бібліятэцы аграгарадка Кавалі”, літаратурнага вандравання “Ён заслужыў любоў народа” – у Гарохаўскай бібліятэцы, вечара-партрэта “Нястомны працаўнік” – у бібліятэцы аграгарадка Міхалёва, гумарыстычнай хвілінкі “Я – пякучка Крапіва” – у бібліятэцы аграгарадка Хімы.