Лыжныя гонкі ў рамках круглагадзічнай спартакіяды школьнікаў прайшлі ў Бабруйскім раёне сёння. Мерапрыемства, у якім прынялі ўдзел навучэнцы 11-ці раённых устаноў адукацыі, было наладжана на базе аздараўленчага лагера “Бабраня-2010”.

— Удзельнікі лыжных гонак добра падрыхтаваліся да спаборніцтваў, былі ў добрым настроі, стараліся паказаць высокія вынікі — прынесці плён і сабе, і сваёй камандзе, — адзначыла галоўны суддзя мерапрыемства, старшыня Фізкультурна-спартыўнага клуба Бабруйскага раёна Таццяна Цімошак.

Між тым, пераможцы, як і заўжды ў спаборніцтвах, вызначыліся. У камандным першынстве не было роўных вучням Брожскай сярэдняй школы, прычым, як малодшай, так і старэйшай узроставых груп. На 2-ім месцы Каменская СШ, на 3-м — Осаўская БШ.   

У асабістым першынстве сярод хлопчыкаў малодшай узроставай групы 1-е месца заняў Яўген Барысенка з Брожскай школы, 2-е — Іван Гальцоў з гэтай жа ўстановы адукацыі,на 3-м — Дзмітрый Гайкоў з Каменскай СШ.

 У старэйшай узроставай групе лідарам прызнаны Ягор Левін (Брожская СШ), 2-е месца прысуджана Цімафею Левашову (Туркоўская СШ), 3-е — Сяргею Камышу (Ленінская СШ).

Сярод малодшых дзяўчынак найбольшую хуткасць у гонках прадэманстравала Ульяна Гальцова з Брожскай СШ, другой прыйшла Анастасія Дзіброва з Осаўскай БШ, на 3-м месцы — Аляксандра Няхлебава з гэтай жа навучальнай установы.

Сярод дзяўчынак старэйшай узроставай групы 1-е месца заняла Эльвіра Гальцова (Брожская СШ), другі вынік у Паліны Харанека (Брожская СШ), 3-е месца прысуджана Яўгеніі Дайнека з Бортнікаўскай СШ.

Віншуем пераможцаў!

Алена КАРПЕНКА.

Фота Віктара ШЭЙКІНА.