Чарговае пасяджэнне пастаянна дзеючай раённай камісіі па кантролі за садзеяннем занятаці насельніцтва, якую ўзначальвае старшыня Бабруйскага райсавета дэпутатаў Ірына Старавойтава, сёння працавала ў раённым адддзеле ўнутраных спраў.

У камісію звярнулася пяць чалавек, сярод іх і грамадзяне, у дачыненні якіх з боку міліцыі ажыццяўляецца прэвентыўны нагляд.

Заслухаўшы кожнага, з улікам пажаданняў грамадзян і іх магчымасцяў, вяскоўцам прапанавалі розныя варыянты працаўладкавання. У прыватнасці, 50-гадоваму жыхару в. Дуброва выдалі накірунак да наймальніка — ЗАТ “Птушкафабрыка «Вішнёўка”. 19-гадовы жыхар Туголіцы запэўніў, што з панядзелка прыступае да працы на адным з харчовых прадпрыемстваў Бабруйска. А вось  жыхару в. Качаны, які на камісію па садзеянні занятасці прыходзіць не ўпершыню, давядзецца, магчыма, і ўвогуле на некаторы час развітацца са свыклым ладам жыцця: парушыў патрабаванні прэвентыўнага нагляду. Між тым зусім нядаўна, каб афіцыйна працаўладкавацца, грамадзянін узнавіў страчаны пашпарт. Такое звычайна здараецца, калі час у чалавека ёсць, а адказнасці няма.

У другой частцы пасяджэння члены камісіі прынялі адпаведныя рашэнні ў дачыненні грамадзян, якія прадставілі ў камісію неабходныя дакументы па пацверджанні афіцыйнага працаўладкавання.

Алена КАРПЕНКА.

Фота аўтара.