Болей за 20 чалавек — жыхары аграгарадка Кавалі і суседніх вёсак — наведалі сёння раённую камісію па кантролі за садзеяннем занятасці насельніцтва, якая працавала ў мясцовым сельвыканкаме пад началам старшыні камісіі, старшыні райсавета дэпутатаў Ірыны Старавойтавай.

Грамадзяне працаздольнага ўзросту, мужчыны і жанчыны, справаздачыліся членам камісіі, чаму не задзейнічаны ў эканоміцы краіны, з чаго жывуць, дзе бачаць прымяненне сваім кампетэнцыям, што прадпрымаюць дзеля паляпшэння ўласнага і краіны дабрабыту. Пераважнай частцы наведвальнікаў былі выдадзены накірункі да наймальнікаў, у асноўным — ААТ “Неўскі-Агра”, дзе на сёння маюцца рабочыя вакансіі.

Жыхарам, якія заявілі аб афіцыйным працаўладакаванні ў Расійскай Федэрацыі, рэкамендавана прадаставіць дакументальнае пацверджанне гэтага. Апошняе камісія запатрабавала і ў шматдзетнай маці, якая свой няўдзел у напаўненні раённага бюджэту патлумачыла доглядам дзіцяці да 7-мі год. Грамадзяне, занятыя на ўласнай падсобнай гаспадарцы — вырошчваннем раслін і жывёлы, прадаставілі ў камісію адпаведныя даведкі. Тым з наведвальнікаў, хто сваё непрацаўладкаванне патлумачыў кепскім фізічным станам, рэкамендавана звярнуцца ў мясцовую амбулаторыю ўрача агульнай практыкі для ўстанаўлення дыягназу і лячэння. 

— Ці скарыстаюцца сяльчане кампетэнтнымі парадамі камісіі і магчымасцю стаць паўнавартаснымі членамі працоўных калектываў, пакажа час, — адзначыла Ірына Старавойтава. — Між тым аргументы “за гэта” грамадзянам прыводзім больш чым пераканаўчыя: афіцыйнае працаўладкаванне — не толькі стабільнае сёння, але і абароненае заўтра, забяспечаная, з пенсійнымі выплатамі, старасць, на парозе якой многія з сённяшніх наведвальнікаў знаходзяцца. Што датычыцца працы, то яна знойдзецца для кожнага, было б жаданне людзей на гэта.

Алена КАРПЕНКА.

Фота аўтара.