Урачыстасць з нагоды Дня работнікаў сельскай гаспадаркі і перапрацоўчай галіны аграпрамысловага комплекса прайшла сёння ў раённым Цэнтры культуры.

Павіншаваць калектывы і людзей, якія сваёй працай садзейнічаюць  стварэнню харчовай бяспекі краіны, прыйшлі прадстаўнікі раённай выканаўчай улады, раённага Савета дэпутатаў, райкама прафсаюза работнікаў АПК і інш.

— Станоўчых вынікаў можа дасягнуць толькі той, хто працуе з душой. І мне прыемна канстатаваць, што такіх людзей у нас шмат, — адзначыў першы намеснік старшыні Бабруйскага райвыканкама — начальнік райсельгасхарчу Аляксандр Каўранін. Ён падзякаваў работнікам аграрнай галіны за нялёгкую і выніковую працу, пажадаў не спыняцца на дасягнутым, шчасця, міру, дабрабыту. І ўручыў ганаровыя граматы,  прэміі раённага выканаўчага камітэта сельгасарганізацыям, якія дасягнулі найвышэйшых вынікаў на веснавых палявых работах, — ААТ “Неўскі-Агра” (1-е месца), СВК “Гігант” (2-е месца), ААТ “Міхалёўская Ніва” (3-е месца); на восеньскай сяўбе і падняцці зябліва ў аптымальныя тэрміны: СВК “Гігант” (1-е месца), ААТ “Міхалёўская Ніва” (2-е месца), філіял “Харчавік-Агра” ААТ “Чырвоны харчавік-АграСэрвіс” (3-е месца); лісты ўдзячнасці кіраўнікам сельгасарганізацый — дырэктару ААТ “Міхалёўская Ніва” Ігару Ганчарову (1-е месца), дырэктару філіяла “Харчавік-Агра” ААТ “Чырвоны харчавік-АграСэрвіс” Марыне Аўрамчык (2-е месца), дырэктару ААТ “Агракамбінат Бабруйскі” Міхаілу Барадзіну (3-е месца), механізатарам, вадзіцелям, галоўным аграномам, інжынерам, эканамістам, ветурачам сельгаспрадпрыемстваў і арганізацый, якія садзейнічаюць нарошчванню прадукцыі, а таксама работнікам філіяла “Бабруйскі” ААТ “Бабуліна крынка” — кіруючай кампаніі холдынга  “Магілёўская малочная кампанія “Бабуліна крынка”, чыя праца прызнана найбольш паспяховай.

 Лісты ўдзячнасці аграрыі раёна атрымалі таксама ад раённага Савета дэпутатаў і райкама прафсаюза работнікаў АПК — апошнія ўручыў лідар раённай прафсаюзнай галіновай арганізацыі Максім Ганжураў.

Прыемным падарункам для працаўнікоў сельскай гаспадаркі стала і цудоўная канцэртная праграма, падрыхтаваная творчымі калектывамі раёна.

Алена КАРПЕНКА.

Фота Віктара ШЭЙКІНА.