Узначаліла пасяджэнне раённай камісіі па каардынацыі работы па садзеянні занятасці насельніцтва намеснік старшыні камісіі, намеснік старшыні Бабруйскага райвыканкама Марына Тарэлкіна.

Выключна ўсе з грамадзян, якія прыйшлі сёння на камісію, па той ці іншай прычыне значацца на ўліку ў Бабруйскім РАУС. Афіцыйнага працаўладкавання не маюць, але задумваюцца пра гэта ці блізкія да вырашэння адпаведнай задачы. У прыватнасці, двое з наведвальнікаў, як патлумачылі, на шляху да ўзнаўлення страчаных пашпартоў грамадзяніна Беларусі.

Якія перавагі дае  афіцыйнае працаўладкаванне і з якой непрыемнасцю можна сутыкнуцца ў адваротным выпадку, дасягнуўшы пенсійнага ўзросту? У дэталях пра гэта кожнаму з прысутных распавяла начальнік упраўлення па працы, занятасці і сацабароне райвыканкама Наталля Пясоцкая. Апошняе датычыцца ў тым ліку жыхара аг. Леніна, які праз колькі месяцаў збіраецца на пенсію, маючы 20 год стажу. Пры гэтым пяць апошніх чалавек працуе неафіцыйна, а значыць, не можа разлічваць на далучэнне гэтых год да працоўнага стажу.

Чаму перабівацца часовымі заробкамі і не мець уласнага жылля для фізічна здаровага 40-гадовага чалавека — не выйсце. Чаму прычына страчанага даверу блізкіх — у ім самім. І, галоўнае, якія дакладныя крокі ў яго сітуацыі можна зрабіць, каб падняць уласную самаацэнку. Выслухаўшы гэта, жыхар Бортнікаў прыняў рашэнне папрасіцца на работу ў мясцовае сельгаспрадпрыемства. Камісія пасадзейнічала — дала накірунак да наймальніка.

— Усе з тых, хто сёння прыйшлі на пасяджэнне, недзе падпрацоўваюць. Пры гэтым не задумваюцца, што гадоў ім прыбаўляецца, а стажу ў працоўнай кніжцы — не. Расказваем пра перавагі афіцыйнага працаўладкавання, пра неабходнасць удзельнічаць у напаўненні бюджэту краіны, які дазваляе ім карыстацца многімі сацыяльнымі дабротамі. Вывучаем, у якой галіне чалавек можа прыйсціся, улічваем яго пажаданні і дапамагаем знайсці дакладнае месца працы. Хочацца спадзявацца, што і вынікі сённяшняй нашай работы прынясуць плён, — адзначыла Марына Тарэлкіна.

Тэкст і фота Алены КАРПЕНКА.