Пасяджэнне пастаяннай раённай камісіі па каардынацыі дзейнасці па садзеянні працаўладкаванню насельніцтва прайшло сёння ў аддзеле ўнутраных спраў Бабруйскага райвыканкама. Узначаліла работу камісіі яе старшыня Ірына Старавойтава, кіраўнік дэпутацкага корпуса раёна.

На камісію былі запрошаны вяскоўцы, чыя біяграфія азмрочана судзімасцю. Некаторыя з іх прыйшлі сюды не ўпершыню. Прычыны, па якіх засталіся без пастаяннага месца працы і заробку, грамадзяне называлі розныя, але найбольш частай было нежаданне арганізаваць жыццё з-за злоўжывання спіртнымі напоямі.  Гэта датычыцца і тых, хто пажаліўся на адсутнасць рэгістрацыі па месцы жыхарства  ці страту тых ці іншых дакументаў (апошняе замінае афіцыйнаму працаўладкаванню) — чамусьці спахапіліся пра гэта грамадзяне толькі цяпер.

— Катэгорыя людзей на камісіі ў раённым аддзеле ўнутраных спраў заўжды няпростая і сёння не выключэнне, — адзначыла Ірына Старавойтава. — Многія не працуюць гадамі і да нас на камісію прыходзяць неўпершыню, але мяняць нешта ў сваім жыцці не спяшаюцца. Арганізаваць іх да работы няпроста, але рук не апускаем. Угаворваем, расказваем пра выгоды ад афіцыйнага працаўладкавання: штомесячны заробак, магчымасць адчуваць сябе запатрабаваным у сям’і, у далейшым разлічваць на пенсійнае забеспячэнне. Такім чынам сёння многім выдалі накіраванні да наймальнікаў, улічыўшы і прафесійныя магчымасці грамадзян, і месца іх пражывання, і пажаданні. Будзем спадзявацца, што ўсе яны дойдуць да арганізацый і стануць нядрэннымі працаўнікамі. Тым жа, хто адчувае сябе нямоглым, скардзіцца на хваробу, якая не дазваляе працаваць, парэкамендавалі звярнуцца ў БГП №2 для ўстанаўлення дыягназу і лячэння.   

Работнікі РАУС падчас пасяджэння давялі да прысутных правілы бяспечных паводзін, нагадалі пра адказнасць у выпадку не ладоў з законам.

Алена КАРПЕНКА. Фота аўтара.