Тэлемост паміж Бабруйскім раёнам і Валагодскай муніцыпальнай акругай Расійскай Федэрацыі, у межах святкавання Дня яднання народаў Беларусі і Расіі, прайшоў у райвыканкаме сёння.

Дэлегацыі бакоў узначалілі старшыня Бабруйскага райвыканкама Міхаіл Крыцкі і галава  Валагодскай муніцыпальнай акругі Юрый Жаваранкаў. Кіраўнікі рэгіёнаў павіншавалі жыхароў абодвух краін са святам, пажадалі удзельнікам тэлемаста плённай працы на агульную карысць.

— Сённяшняя дата — сімвал духоўнай роднасці нашых народаў, культур і традыцый. І нам трэба ўсімі сіламі садзейнічаць захаванню гістарычнай памяці, — адзначыў Міхаіл Крыцкі.  

Тэмамі абмеркавання бакоў сталі маладзёжная палітыка, грамадзянскае і патрыятычнае выхаванне падрастаючага пакалення, падрыхтоўка да святкавання 80-годдзя Перамогі ў Вялікай Айчыннай вайне. Як апошняе ажыццяўляецца на Валагодчыне, у дэталях распавяла намеснік галавы муніцыпальнай акругі Людміла Нікуліна. Дзмітрый Вяроўкін, начальнік аддзела ідэалагічнай работы і па справах моладзі Бабруйскгага райвыканкама, падрабязна спыніўся на рэалізацыі дзяржаўнай маладзёжнай палітыкі ў Бабруйскім раёне. Галоўны спецыяліст аддзела па адукацыі райвыканкама Вольга Караткевіч распавяла пра арганізацыю работы ўстаноў адукацыі па грамадзянскім і патрыятычным выхаванні дзяцей і падлеткаў. Тэму дапоўнілі старшыня раённай арганізацыі Беларускага грамадскага аб’яднання ветэранаў Яўгенія Доўнар, старшыня Маладзёжнага Савета пры Бабруйскім райсавеце дэпутатаў Вольга Гаўрыленя, дырэктар Цэнтралізаванай клубнай сістэмы раёна Марыя Лаўрыновіч, а таксама лідары раённых маладзёжных арганізацый БРПА і БРСМ Алена Смарчок і Дар’я Панцялеева. Аб сваёй рабоце ў гэтым накірунку падзяліліся і прадстаўнікі Расіі.

Вынікам завочнай сустрэчы стаў абмен вопытам па абмеркаваных пытаннях. Кожны з бакоў ўзяў на ўзбраенне цікавыя напрацоўкі, ініцыятывы і праекты суседзяў. Дамовіліся аб правядзенні сумесных акцый і аб новых, цяпер ужо вочных, сустрэчах.

У заключэнне тэлемаста яго ўдзельнікі абмяняліся творчымі нумарамі — сумесна выканалі добразнаёмыя народам абодвух краін песні “Волагда” (з рэпертуара беларускіх “Песняроў”)  і “Мы за цаной не пастаім”.

Алена КАРПЕНКА. Фота Віктара ШЭЙКІНА.