Дэпутаты Палаты прадстаўнікоў Нацыянальнага сходу Рэспублікі Беларусь Антон Каранкевіч і Аксана Прыходзька сустрэліся сёння з калектывам СВК “Гігант”, распавялі пра сваю работу ў акругах і парламенце.

У прыватнасці Антон Каранкевіч, з’яўляючыся членам Пастаяннай камісіі па прамысловасці, энергетыцы, транспарце, сувязі і лічбавым развіцці, засяродзіў увагу на выгадзе для краіны ад узвядзення атамнай электрастанцыі: адмаўленне ад імпарту электраэнергіі, зніжэнне выкідаў у атмасферу парніковых газаў, залежнасці ад прыроднага газу, развіццё сумежнай прамысловасці, а таксама аб намерах пабудаваць у Беларусі яшчэ адну АЭС ці пашырыць магчымасці першай. У Бабруйскім раёне, па словах дэпутата, згодна з распрацаванай праграмай праводзіцца рэканструкцыя электрычных сетак, што дазваляе вяскоўцам мець больш камфортныя ўмовы жыцця.

Аксана Прыходзька распавяла аб законатворчай дзейнасці дэпутатаў ніжняй палаты парламенту, спынілася на зменах у законах, прынятых апошнім часам. Сярод новаўвядзенняў — зніжэнне з 10 да 8 год ніжняга парогу пакарання за распаўсюд наркотыкаў; атрыманне прафесіі па аналогіі вучэбна-вытворчых камбінатаў у вясковых школах; распаўсюджанне грантаў Прэзідэнцкага фонду на студэнтаў не толькі бюджэтнай формы навучання, але і платнай; магчымасць для навучэнцаў ужо ў 17-гадовым узросце (пры наяўнасці вадзіцельскага пасведчання) кіраваць энерганасычаным трактарам і інш.

Таксама дэпутаты адказалі і прынялі да ведама хвалюючыя працаўнікоў пытанні: адносна рамонту дарог у аграгарадку, ільготнай цаны на электрычнасць у сельскай мясцовасці, далейшай рэканструкцыі электрычных сетак у раёне. 

Пасля сустрэчы з калектывам Антон Міхайлавіч і Аксана Ігараўна пацікавіліся ходам падрыхтоўкі сельгаспрадпрыемства да пасяўной. Пабылі ў бульбасховішчы гаспадаркі, пацікавіліся ўмовамі захавання і якасцю насеннага матэрыялу. Наведалі іншыя аб’екты “Гіганта”. Правялі маніторынг цэн і асартыменту тавараў у краме Кіраўскага райста.

Алена КАРПЕНКА. Фота Віктара ШЭЙКІНА.