Сёння рэспубліканская акцыя “Мы — грамадзяне Беларусі” прайшла ў Палацы культуры вобласці. У ліку ганаровых гасцей прысутнічалі старшыня Магілёўскага аблвыканкама Анатоль Ісачанка, памочнік Прэзідэнта-інспектар па Магілёўскай вобласці Сяргей Налівайка, іншыя адказныя асобы.

Сярод юнакоў і дзяўчат: выдатнікаў вучобы, пераможцаў прадметных алімпіяд, творчых конкурсаў, спартыўных спаборніцтваў, актыўных удзельнікаў грамадскага жыцця, якім сёння ў Магілёве ўручылі галоўны дакумент, — і вучань Туголіцкай СШ Павел Сергіевіч.

— З атрыманнем пашпарта вы становіцеся паўнавартаснымі грамадзянамі Рэспублікі Беларусь. Памятайце — Канстытуцыя гарантуе вам правы, і вы заўжды будзеце адчуваць падтрымку нашай дзяржавы. Але пры гэтым варта ўсведамляць, што вы таксама нясеце адказнасць і найперш — перад сваімі бацькамі і настаўнікамі. Упэўнены, што кожны з вас зробіць свой унёсак у развіццё не толькі Магілёўшчыны, але і ўсёй Беларусі, — сказаў Анатоль Міхайлавіч.

***

А вось навучэнка Варатынскай сярэдняй школы Марыя Шаўчэнка, актывістка раённай арганізацыі БРПА і пераможца вучэбных алімпіяд, пашпарт грамадзяніна Рэспублікі Беларусь атрымала з рук старшыні Камітэта дзяржаўнага кантролю Васіля Герасімава.

Мерапрыемства з гэтай нагоды адбылося ў сталіцы Беларусі ў сераду, 12 сакавіка.