“Сяло — тэрыторыя развіцця”: расказваем, як Бабруйскі раён прымаў удзельнікаў рэспубліканскага форуму сельскай моладзі
Рэспубліканскі форум “Сяло — тэрыторыя развіцця” ладзіўся 26-27 лістапада. Учора мерапрыемствы праходзілі ў Кіраўскім раёне. А сёння ўдзельнікі форуму — каля 70 юнакоў і дзяўчат з усіх куткоў краіны, якія працуюць у сельскай мясцовасці, — пабылі на Бабруйшчыне, у Цялушы, наведалі сацыяльна-культурныя аб’екты аграгарадка.
У Цялушскай сярэдняй школе пазнаёміліся з вопытам работы па фарміраванні здаровага ладу жыцця ў маладзёжным асяродку і рэалізацыяй ініцыятывы “Патрыятычны музей”, з праектам “Цялуша. Праз гісторыю спадчыны да здаровай будучыні” ў межах рэалізацыі дзяржаўнага прафілактычнага праекта “Здаровыя гарады і пасёлкі”, са шматлікімі выставамі, у тым ліку — высокіх спартыўных дасягненняў школьнікаў.
Наведалі таксама мясцовую славутасць — Свята-Мікольскі храм, дзе маладым людзям быў прапанаваны гістарычны экскурс “Нашчадкі Пушкіна на бабруйскай зямлі”. Усклалі кветкі да магілы ўнучкі паэта Н.А. Варанцовай-Вельямінавай і да брацкай магілы савецкіх воінаў.
Завяршыўся рэспубліканскі форум азнаямленнем з вопытам работы Цялушскага сельскага Дома культуры і мясцовай бібліятэкі па арганізацыі вольнага часу моладзі і прыняццем рэзалюцыі форуму — актыўна садзейнічаць таму, каб жыццё і праца моладых людзей на сяле станавіліся больш прыцягальнымі.
***
Мы папрасілі ўдзельнікаў форуму — маладых спецыялістаў з Бабруйскага раёна падзяліцца сваімі ўражаннямі ад маштабнага мерапрыемства.
Максім Сундукоў, заатэхнік ААТ “Міхалёўская Ніва”:
— І ўчора, і сёння ўбачылі і пачулі шмат цікавага. У прыватнасці, у Цялушскай школе мяне ўразіла пазнавальная інфармацыя пра вядомых людзей, якія ў розны час жылі і тварылі на зямлі Бабруйшчыны і ў Цялушы. Вельмі цікава было дазнацца пра высокія спартыўныя дасягненні вучняў школы.
***
Міхаіл Сачкоўскі, аграном філіяла “Харчавік-Агра” ААТ “Чырвоны харчавік-АграСэрвіс”:
— Родам я з Гомельшчыны. Прапанавалі працу ў Бабруйскім раёне, і я пагадзіўся. У сельгаспрадпрыемстве сустрэлі вельмі цёпла, такое ўражанне, што працую тут даўно, а не меней за год. Я рады, што прыняў удзел у форуме. Пабачылі шмат знакавых месцаў, у тым ліку Бабруйскую крэпасць, наведалі не адно сельгаспрадпрыемства, дзе мне, як спецыялісту, было асабліва цікава.
Алена КАРПЕНКА. Фота Віктара ШЭЙКІНА.
