У рамках праекта «Бабруйскі раён: 100 гадоў са знакам якасці» сёння мы расказваем аб тым, як ідзе будаўніцтва сучаснага МТК у філіяле «Харчавік-Агра» ААТ «Чырвоны харчавік-АграСэрвіс». Прэзідэнт Аляксандр Лукашэнка яшчэ ў мінулым годзе даў даручэнне сур’ёзна абнавіць аб’екты АПК па ўсёй краіне.

Увядзенне ў эксплуатацыю двух малочна-таварных комплексаў на 600 галоў дойнага статка кожны плануецца ў Бабруйскім раёне сёлета.

На будаўнічым аб’екце ў філіяле «Харчавік-Агра» ААТ «Чырвоны харчавік-АграСэрвіс», дзе пабылі нашыя карэспандэнты ў панядзелак, работы актыўна вяліся нягле­дзячы на дажджлівае надвор’е: было чым заняцца ўнутры збудаванняў. Два прасторныя кароўнікі з сучасным абсталяваннем для ўтрымання жывёлы, малочна-даільная зала — ужо цяпер адчуваецца маштабнасць будоўлі і будучага МТК.
— Пачалі будаўнічыя работы 25 жніўня мінулага года і ў адведзены на іх тэрмін — 12 месяцаў — разлічваем завяршыць. Апошні месяц будаўнічых работ — верасень сёлетняга года. А да першага кастрычніка збіраемся ўвесці комплекс у эксплуатацыю. На сёння гатоў­насць аб’екта — у межах 80%. На да­дзеным этапе адбываецца мантаж даільна-малочнага абсталявання, пастаўшчык якога (і займаецца мантажом) ААТ «Гомельагракамплект». Падрадная арганізацыя, якая выконвае будаўнічыя работы — кампанія «МагілёўБудМантаж». Такім чынам, усё вядзецца згодна плану, у вызначаныя тэрміны ўкладваемся. Работы на аб’екце кантралюем, дзеля гэтага штопанядзелка і кожны чацвер праводзім тут штабы з удзелам прадстаўнікоў заказчыка, падрадчыка, райвыканкама, — адзначыў дырэктар ААТ «Чыр­в­оны харчавік-АграСэрвіс» Алег Пілі­пенка.

Кошт аб’екта, як ён паведаміў, — 19 млн. рублёў без уліку абсталявання. Поўны кошт — 23 млн. рублёў. На фінансаванне задзейнічаны ў тым ліку крэдытныя сродкі Белаграпрамбанка: на агульных умовах банка і пад гарантыі Магілёўскага аблвыканкама.
Яшчэ адзін такі ж малочна-таварны комплекс на тэрыторыі раёна ўзводзіцца ў ААТ «Міхалёўская Ніва».

Алена КАРПЕНКА. Фота Віктара ШЭЙКІНА.