Зберагчы здароўе і жыццё — менавіта такі лейтматыў семінара-вучобы, які сабраў сёння на базе філіяла “Харчавік-Агра” ААТ “Чырвоны харчавік-АграСэрвіс” болей за 100 чалавек — прадстаўнікоў камітэта па сельскай гаспадарцы і харчаванні Магілёўскага аблвыканкама, абласнога ўпраўлення Дэпартамента дзяржаўнай інспекцыі працы, абласной прафсаюзнай арганізацыі работнікаў аграпрамысловага комплексу, УСК РБ па Магілёўскай вобласці, прадстаўнікоў органаў дзяржаўнага нагляду (Бабруйскага ГРАНС, Цэнтра гігіены і эпідэміялогіі, Бабруйскага міжраённага аддзялення  філіяла “Дзяржэнергагазнагляд” па Магілёўскай вобласці, райаддзела ДАІ), прадстаўнікоў Бабруйскага райвыканкама, спецыялістаў райсельгасхарчаў, якія курыруюць пытанні аховы працы Бабруйскага, Глускага, Кіраўскага, Клічаўскага і Асіповіцкага раёнаў, галоўных інжынераў і спецыялістаў па ахове працы сельгасарганізацый. Мэта, якая ставілася — удасканаленне работы па ахове працы, транспатрнай і пажарнай бяспецы, стварэнне неабходных санітарна-бытавых умоў работнікаў сферы АПК.

На машынным двары “Харчавіка-Агра” ўдзельнікаў семінара пазнаёмілі з работай, якая праводзіцца ў гаспадарцы па ахове працы і пажарнай бяспецы, у тым ліку па арганізацыі тэрыторыі мехдвара ў зімовы перыяд, па праходжанні прыборнага кантролю на прадмет знаходжання работнікаў ў стане алкагольнага ап’янення, выкананні патрабаванняў бяспекі падчас правядзення тэхнічнага абслугоўвання трактароў, аўтамабіляў і г. д. Прадстаўнік Дзяржэнергагазнагляду нагадаў патрабаванні да работы са зварачным абсталяваннем.

Падчас плянарнага пасяджэння, якое прайшло ў Цялушскім СДК, у дэталях абмеркавалі прычыны няшчасных выпадкаў на сельгасвытворчасці, што здарыліся ў 2023 годзе на Магілёўшчыне, а таксама меры па іх папярэджанні, выкананне патрабаванняў пажарнай, транспартнай бяспекі, патрабаванні да электрабяспекі падчас правядзення палявых работ, забеспячэнне працаўнікоў сродкамі аховы працы (у зале СДК была наладжана выстава спецадзення прадпрыемства “Восток-Сервис”), арганізацыю правядзення медагляду работнікаў. Увага прысутных была засяроджана на крымінальнай адказнасці за парушэнні правілаў аховы працы.

— Такія семінары — міжраённыя, практычныя, з кіраўнікамі і спецыялістамі сельскагаспадарчых прадпрыемстваў, арганізаваны ва ўсіх рэгіёнах Магілёўшчыны. Праводзім іх для таго, каб засяродзіць увагу адказных за ахову працы на тыя “вузкія” месцы, якія маюцца ў сельгасарганізацыях у гэтым накірунку. Каб людзі, прыехаўшы да сябе ў арганізацыю, яшчэ раз уважліва прааналізавалі пытанні аховы працы і прывялі сваё абсталяванне, працоўныя месцы ў адпаведнасці з патрабаванямі бяспекі. Наша мэта, каб гэтых “вузкіх” месцаў, парушэнняў увогуле не было і каб людзі не траўмаваліся, — адзначыў першы намеснік начальніка Магілёўскага абласнога ўпраўлення Дэпартамента дзяржаўнай інспекцыі працы Дзмітрый Малахаў.

Алена КАРПЕНКА. Фота аўтара.