Кампартыя Беларусі вызначылася з кандыдатамі ў дэпутаты
Другое пасяджэнне пазачарговага XIV (XLVI) з’езда Камуністычнай партыі Беларусі прайшло 17 снежня ў Мінску. Яго работу ўзначаліў першы сакратар Цэнтральнага Камітэта Камуністычнай партыі Беларусі Аляксей Сокал.
На парадку дня другога пасяджэння з’езда стаяла чатыры пытанні: аб задачах Камуністычнай партыі Беларусі ў выбарчай кампаніі 2024 года па выбарах у Саветы ўсіх узроўняў; аб перадвыбарчай Платформе Камуністычнай партыі Беларусі да адзінага дня галасавання ў 2024 годзе; аб вылучэнні кандыдатаў у дэпутаты Палаты прадстаўнікоў Нацыянальнага сходу Рэспублікі Беларусь восьмага склікання ад Камуністычнай партыі Беларусі і аб звароце Камуністычнай партыі Беларусі да выбаршчыкаў.
Удзел у другім пасяджэнні з’езда ў складзе дэлегацыі Магілёўскай вобласці прыняў і сакратар Бабруйскай раённай арганізацыі Камуністычнай партыі Беларусі Сяргей Феднеў.
— Работа з’езда была дастаткова насычанай. Па кожным пытанні былі прыняты адпаведныя пастановы. Што датычыцца вылучэння кандыдатаў, то з’езд вылучыў больш за 50 прэтэндэнтаў для ўдзелу ў выбарах-2024 ад Камуністычнай партыі Беларусі, — адзначыў лідар раённай арганізацыі Кампартыі Беларусі.
Алена КАРПЕНКА.
На фота: дэлегацыя Магілёўскай вобласці.
