Не дае заспакоіцца восень
Работы на палях раёна працягваюцца. Тое, што вырошчвалі на працягу года, укладваючы працу і грошы, без сумневу, павінна быць якасна сабрана і пакладзена ў засекі, іншае пастаўлена дзяржаве ў лік дзяржзаказу. Яшчэ адзін вялікі клопат гэтай пары — сяўба, закладка ўраджаю будучага года.
Па дадзеных райсельгасхарчу, на раніцу ўчарашняга дня ў раёне пасеяна 7525 гектараў або 75% ад плану. У СВК “Гігант” сяўба азімых завершана.
Актыўна працягваецца ўборка кукурузы на сілас. Убрана 3653 гектары (54% ад патрэбы), нарыхтавана каля 98 000 тон сіласу пры сярэдняй ураджайнасці зялёнай масы 320 ц/га.
Ужо прыступілі і да ўборкі кукурузы на зерне. Убрана 344 гектары ці 28% ад неабходнага, намалочана 2598 тон. Сярэдняя ўраджайнасць зерня —
75 ц/га. Пры гэтым у “Гіганце” з аднаго круга бяруць па 108 ц, у ААТ “Саўгас Кісялевічы” — па 90 ц, у ААТ “Міхалёўская Ніва” — па 78 ц.
Грэчку ў сельгасарганізацыях Бабруйшчыны цалкам убралі, намалаціўшы 734 тоны зерня пры сярэдняй ураджайнасці 14 ц/га. Найвышэйшы паказчык ураджайнасці дасягнуты ў ААТ “Неўскі-Агра” — 24 ц/га, другі па велічыні паказчык — у СВК “Гігант”
(22 ц/га).
Падыходзіць да завяршэння капанне бульбы — ураджай радуе. На гэтую пару ў раёне ўбрана 343 гектары бульбяных палёў або 70% ад плану. Накапана звыш 13 000 тон клубняў пры сярэдняй ураджайнасці 396 ц/га.
Алена КАРПЕНКА.