Хлябы ўбралі, сеюць новыя
Напружанасць, якой традыцыйна суправаджаецца жніво, з завяршэннем уборкі збажыны і зернебабовых некалькі спала. І сёння мы падводзім вынікі асабліва гарачай пары.
Намалот зерня збожжавых і зернебабовых раслін у цэлым па раёне, па папярэдніх дадзеных, складае 28 631 тоны. Ураджайнасць хлябоў — 26,3 ц/га.
Найбольшы намалот зерня збажыны і зернебабовых дасягнуты ў СВК “Гігант” — 6911 тон. Другі па велічыні паказчык — у ААТ “Неўскі-Агра” (6622 т), трэці — у ААТ “Міхалёўская Ніва” (5999 т).
Першынства па ўраджайнасці традыцыйна ўтрымлівае СВК “Гігант”, дзе з аднаго круга ўзялі па 42,4 цэнтнеры. Другой па ўраджайнасці атрымалася хлебная ніва філіяла “Варатынь” ААТ “БЗТДіА” — 34 ц/га, трэцяй — ААТ “Міхалёўская Ніва” (30 ц/га). Амаль на ўзроўні сярэднераённага паказчыка ўраджайнасць збожжавых і зернебабовых у ААТ “Неўскі-Агра” — 26 ц/га.
Ва ўборцы хлябоў было задзейнічана 46 экіпажаў зернеўборачных камбайнаў, у тым ліку 3 — моладзевыя. 8 экіпажаў намалацілі тысячу і болей тон зерня, у тым ліку моладзевы. На рахунку аднаго з экіпажаў (СВК “Гігант”) — дзве тысячы тон сабранага ўраджаю.
На перавозцы зерня ад камбайнаў 12 вадзіцеляў прызнаны тысячнікамі, у тым ліку адзін — двухтысячнікам.
Гэтым часам у сельгаспрадпрыемствах раёна займаюцца зборам ураджаю прамежкавых культур. Пасеяўшы азімы рапс, з усёй адказнасцю прыступілі да сяўбы азімай збажыны і актыўна ўзяліся за ўборку кукурузы на сілас. Убрана, па апошніх дадзеных, 251 гектар або 4% ад задання пры сярэдняй ураджайнасці зялёнай масы 281 ц/га, нарыхтавана 7033 тон сіласу.