На адной хвалі з моладдзю. Дыялог маладых спецыялістаў з кіраўніцтвам раёна адбыўся на Бабруйшчыне (фота+відэа)
“Адзінства. Маладосць. Прафесіяналізм” — пад такой назвай адбыўся сёння адкрыты дыялог кіраўніцтва раёна з маладымі спецыялістамі. Удзел у мерапрыемстве прынялі начальнікі ўпраўленняў і аддзелаў Бабруйскага райвыканкама на чале са старшынёй Аляксандрам Сухадольскім, прадстаўнікі раённых службаў, грамадскіх арганізацый. На сустрэчу з моладдзю прыйшоў і дэпутат Палаты прадстаўнікоў Нацыянальнага сходу Рэспублікі Беларусь Уладзімір Гацко.
Адкрыты дыялог дазволіў юнакам і дзяўчатам, чыім першым працоўным месцам стала Бабруйшчына, падрабязна даведацца пра свае гарантыі ў якасці маладога спецыяліста, пра перспектывы кар’ернага росту, пачуць адказы на хвалюючыя пытанні і проста пазнаёміцца адзін з адным, падзяліцца ўражаннямі ад сустрэчы з калектывамі.
І старшыня райвыканкама Аляксандр Сухадольскі, і іншыя, каму адрасаваліся пытанні, шчыра падзяліліся з моладдзю сваімі ўражаннямі ад выбару прафесіі і першага працоўнага месца, пажадалі маладым людзям быць ініцыятыўнымі, крэатыўнымі, не баяцца перашкод на шляху да прафесійнага росту. Не заставацца сам на сам з праблемамі, калі раптам узнікнуць. У раёне нацэлены на стварэнне камфортных умоў працы і пражывання новым працаўнікам — для вырашэння пытанняў існуе шырокая сетка створаных магчымасцяў. Гатовы падтрымаць любую добрую, накіраваную на памнажэнне дабрабыту раёна і краіны ініцыятыву з боку маладых.
Падрабязнасці чытайце у наступным нумары “раёнкі”, а пакуль — глядзіце відэа і наш вялікі фотарэпартаж з мерапрыемства.
Алена КАРПЕНКА. Фота Віктара ШЭЙКІНА.