У «Гіганце» ўбіраюць азімы рапс
Поле ў накірунку Туркоў, дзе ў панядзелак вяліся работы, — адно з двух занятых у гаспадарцы пад гэтую азімую расліну. У сувязі з тым, што вільготнасць масланасення на пачатак уборачных работ некалькі вышэйшая за тэхналагічную, убіраць палі вырашана не ад краю да краю, як гэта звычайна бывае, а выбарачна, участкамі, якія сушэй.
— Убіраем рапс першы дзень. У ідэале можна было б яшчэ колькі дзён пачакаць, але надвор’е непрадказальнае. Дажджы, якія прагназуюцца, непагадзь могуць негатыўна паўплываць на ўраджай. Такое здаралася, і гэта мала сказаць непрыемна. Каб падобную сітуацыю папярэдзіць, не рызыкаваць ураджаем і не дапусціць яго страт, вырашана выйсці ў поле і дасушваць намалочанае, — расказаў галоўны аграном СВК “Гігант” Уладзімір Аляксандравіч Залужны, якога засталі на месцы ўборачных работ.
Ураджайнасць азімай расліны, па папярэдняй ацэнцы спецыяліста, павінна быць нядрэннай, хоць і не максімальнай за часы яго работы. Ва ўмовах цяперашняга года, як ён адзначыў, і за гэта вялікі дзякуй. Ёсць спадзяванне і на папаўненне насеннага фонду гаспадаркі.
Убіралі рапс у “Гіганце” двума зернеўборачнымі камбайнамі LEXION CLAAS. У складзе экіпажаў — вопытныя механізатары. Настрой на працу ў хлебаробаў “Гіганта” выдатны: тэхніка да ўборкі, як заўжды, добра падрыхтавана, хлебная ніва радуе вока, абяцаючы нядрэнны намалот, а значыць — год працавалі не дарэмна.
Рапсавая (азімая) ніва ў СВК складае 27 гектараў. На ўчарашнюю раніцу, як стала вядома, было ўбрана 5 гектараў, з круга ўзялі па 29 цэнтнераў. І гэта на сённяшні дзень найвышэйшы паказчык у раёне.
Алена КАРПЕНКА. Фота Юрыя ЮРКЕВІЧА.