Наведвальнікамі раённай камісіі па каардынацыі дзейнасці па садзеянні працаўладкаванню насельніцтва, якая сёння прайшла на базе Бабруйскага РАУС, сталі вяскоўцы, якія стаяць на ўліку ў крымінальна-выканаўчай інспекцыі і не працаўладкаваны. 

Прычыны апошняга ў кожнага свае: адсутнічае рэгістрацыя, адсутнічаюць вакансіі па месцы жыхарства пры наяўнасці паказанняў (інвалід 3-й групы) да лёгкай працы, не было пашпарту. Кожнаму з наведвальнікаў члены камісіі ў складзе намесніка старшыні Бабруйскага райвыканкама Марыны Тарэлкінай, начальніка ўпраўлення па працы, занятасці і сацыяльнай абароне Наталлі Пясоцкай, сакратара камісіі Юліі Гук, а таксама прадстаўніка ААТ “Агракамбінат Бабруйскі” давялі дзяржаўную палітыку ў адносінах людзей, якія ўхіляюцца ад работы, а значыць — напаўнення бюджэту краіны, прапанавалі каму вакансіі, а каму — алгарытм дзеянняў на шляху да афіцыйнага працаўладкавання, стабільнага заробку.  

Работа, якую праводзіць камісія, хоць і не так імкліва, як хацелася б, але дае плён. Многія з сённяшніх наведвальнікаў пацвердзілі сваё працаўладкаванне, некаторыя — займелі пашпарты або на шляху да гэтага, што дасць людзям магчымасць папрэтэндаваць на вакансію.      

Прадстаўнікі крымінальна-выканаўчай інспекцыі правялі з грамадзянамі, якія прыйшлі на камісію, прафілактычныя размовы — аб наступствах злоўжывання спіртнымі напоямі, недапушчэнні супрацьпраўных паводзін, нагадалі правілы бяспечнага руху.    

Алена КАРПЕНКА. Фота аўтара.