На тэрыторыі Бабруйскага раёна — у СВК “Гігант” — пачаў дзейнічаць сельскагаспадарчы студэнцкі атрад “Чайка” імя Героя Савецкага Саюза Васіля Кузьмінава, створаны з навучэнцаў Бортнікаўскай сярэдняй школы, членаў маладзёжнай арганізацыі.

Дваццаць юнакоў і дзяўчат ва ўзросце ад 14 да 18 год будуць працаваць на сельскагаспадарчых угоддзях прадпрыемства. У гэтыя дні, як адзначыў начальнік агранамічнай службы СВК Аляксандр Парахневіч, школьнікі задзейнічаны на відавой праполцы азімай пшаніцы.
— Гэта ўжо чацвёрты студатрад у раёне. Да гэтага атрады створаны і працуюць на базе Бабруйскага лясгаса — экалагічны, ААТ “Агракамбінат Бабруйскі” — сельскагаспадарчы і ТАА “БабруйскБудСтыль” — будаўнічы. Працуюць у іх вучні адпаведна Брожскай, Гарбацэвіцкай і Каменскай сярэдніх школ, — адзначыла Дар’я Панцялеева, першы сакратар Бабруйскага раённага камітэта ГА “БРСМ”. Раённы камітэт з’яўляецца арганізатарам студ­атрадаўскага руху ў раёне, каардынатарам — аддзел ідэалагічнай работы і па справах моладзі райвыканкама.
Настрой у байцоў, як нам паведамілі, выдатны. І ад ўсведамлення, што сваёй працай прыносяць карысць роднай гаспадарцы, і ад будучага заробку, прызначэнне якога многія ўжо спланавалі.
Алена КАРПЕНКА. Фота Стаса ЧЫЧЭРЫНА.