У “Міхалёўскай Ніве” пачалася касавіца
У ААТ “Міхалёўская Ніва”, куды мы наведаліся ў панядзелак, нарыхтоўкай травянога корму займаліся другі дзень. Задача перад калектывам на сёлетнюю кампанію стаіць сур’ёзная — занатаваць звыш 15 тысяч тон сенажу, каля 20 тысяч тон сіласу і болей за паўтары тысячы тон сена.
На полі ў 50 гектараў паблізу в. Міхалёва-3 засталі два кормаўборачныя комплексы КВК-800 пад упраўленнем Мікалая Іванавіча Канавалава і Сяргея Дзмітрыевіча Шынкарэнкі. Да камбайнаў без супынку пад’язджала тэхніка для перавозкі зялёнай масы. Яе было задзейнічана 7 адзінак: шэсць МАЗаў і трактар з прычэпам. У ліку вадзіцеляў — асы ў сваёй справе: Леанід Пятровіч Шынкарэнка, Сяргей Анатольевіч Шырокі, Рыгор Аляксеевіч Дударэнка, іншыя працаўнікі, чый стаж у гаспадарцы вызначаецца не адным дзясяткам год.
— Ураджайнасць травы на гэтым полі добрая, у межах 200 цэнтнераў з гектара, — не без задавальнення дзеліцца галоўны аграном “Міхалёўскай Нівы” Сяргей Мікалаевіч Мартынчык і ўдакладняе, што такі вынік стаў магчымым дзякуючы своечасова праведзенай падкормцы травы.
Правяленая і здробненая зялёная маса з поля дастаўлялася на малочна-таварную ферму “Воўчая Гара”, да падрыхтаванай згодна з тэхналагічнымі патрабаваннямі траншэі. Там будучы корм падвяргаўся трамбоўцы, якую на трактары Амкадор якасна ажыццяўляў Леанід Леанідавіч Падшывалаў.
Сучасныя тэхналогіі нарыхтоўкі корму немагчымыя без прымянення складаных і энерганасычаных сельскагаспадарчых машын, механізмаў і агрэгатаў, таму, вядома ж, пільная ўвага павінна ўдзяляцца выкананню патрабаванняў аховы працы. Пра гэта ў “Міхалёўскай Ніве”, як нам паведамілі, паклапаціліся. З людзьмі, якія задзейнічаны на сенажаці, своечасова праведзены і праводзяцца адпаведныя інструктажы, маніторынгі стану сельгастэхнікі, работнікі забяспечаны спецадзеннем. Паклапаціліся і пра харчаванне працаўнікоў палёў — яно тут двухразовае, гарачае, смачна прыгатаванае і сытнае.
Словам, старт корманарыхтоўкі ў гаспадарцы дадзены добры. Хочацца спадзявацца, што такім будзе і вынік. Рыхтаваць корм з запасам у гаспадарцы ўмеюць — частка мінулагодняга сенажу, як нам паведамілі, пяройдзе на патрэбы будучай зімоўкі.
Алена КАРПЕНКА. Фота Юрыя ЮРКЕВІЧА.
