Урачыстая лінейка, прысвечаная адкрыццю ў раёне летняй аздараўленчай кампаніі 2023 года, прайшла сёння на базе Туголіцкай сярэдняй школы.

Адкрыла мерапрыемства начальнік аддзела па адукацыі Бабруйскага райвыканкама Алеся Стэльмак. І Алеся Сяргееўна, і іншыя дарослы пажадалі дзецям цікавых канікулаў— іх сёлета аб’яднае рэспубліканская акцыя “Правільнае лета!” — каб адпачынак быў напоўнены яскравымі ўражаннямі, вясёлымі прыгодамі, каб падарыў новых надзейных сяброў. Разам з гэтым хлопчыкаў і дзяўчынак заклікалі падчас лета праявіць свае здольнасці і ўменні, раскрыць творчыя, спартыўныя ды іншыя таленты — рэалізаваць сябе.

Падчас урачыстасці прайшла таксама анлайн-эстафета, падчас якой вучні раённых школ пачаргова падзяліліся планамі і марамі на аздараўленчы сезон, распавялі пра цікавыя і захапляльныя мерапрыемствы, якія ва ўстановах адукацыі падрыхтавалі на гэтую  пару, каб зрабіць яе сапраўды незабыўнай.  

Было шмат музыкі, панаваў радасны, цудоўны настрой. А інакш і быць не магло — адкрылася аздараўленчая кампанія!

Алена КАРПЕНКА. Фота з архіва Цэнтра творчасці Бабруйскага раёна.