Міхалёўцы сталі сведкамі “Песні роднай зямлі”
Шчымліва-захапляльны спектакль па паэмах Алеся Казекі “Медуніца” і “Марыйка” ў рамках маладзёжнага патрыятычнага праекта “Песня роднай зямлі” прадэманстравалі жыхарам Міхалёва і навакольных вёсак, работнікам арганізацый і устаноў на тэрыторыі аграгарадка навучэнцы Магілёўскага дзяржаўнага каледжа мастацтваў — імпрэза адбылася сёння ў Міхалёўскім сельскім Доме культуры.
“Песня роднай зямлі” — гэта ўвасобленая ў мастацтве трагедыя вёскі Боркі Кіраўскага раёна, спаленай разам з жыхарамі ў чэрвені 1942 года. Прывітаўшы залу, Алесь Казека распавёў пра трагічную старонку ў гісторыі сваёй сям’і і тое, як яна звязана з Боркамі, засяродзіў увагу на ідэі сваіх твораў.
— Спектакль пра гармонію прыроды, сусвету, чалавека, а таксама пра тое, што здараецца, калі чалавек гэтую гармонію парушае. Таксама я б папрасіў вас убачыць тут моц душы беларускага народа, уменне трымацца ў любой сітуацыі, — заўважыў Алесь Казека.
Пастаноўка дасягнула сваёй мэты. У зале не было чалавека, чыю б душу не кранулі паднятыя тэмы. А сцэнічнае майстэрства юных артыстаў, іх цудоўнае валоданне роднай мовай, упэўнена, зробяць імпрэзу незабыўнай.
Алена КАРПЕНКА. Фота Дзмітрыя ШАЎЦОВА.