Тэхніка да палявых работ падрыхтавана
Сельскагаспадарчая тэхніка, якую плануецца задзейнічаць у веснавых палявых работах, да выхаду ў поле практычна гатова — пра гэта паведамілі ва ўпраўленні па сельскай гаспадарцы і харчаванні Бабруйскага райвыканкама.
— На сённяшні дзень стопрацэнтна забяспечана пастаноўка на лінейку гатоўнасці тэхнікі, якая будзе задзейнічана ў палявых работах, у філіяле «Харчавік-Агра» ААТ «Чырвоны харчавік-АграСэрвіс», у філіяле «Варатынь» ААТ «БЗТДіА». СВК «Гігант» добра папрацаваў у гэтым плане. Завяршаецца падрыхтоўка ў ААТ «Міхалёўская Ніва», «Неўскі-Агра», «Саўгас Кісялевічы». Некаторая праблема маецца ў ААТ «Агракамбінат Бабруйскі», але мы яе актыўна рашаем і, упэўнены, да 25 сакавіка — такая задача пастаўлена Саветам Міністраў — і з гэтым справімся, — адзначыў намеснік начальніка райсельгасхарча Аляксандр Каўранін.
Аляксандр Мікалаевіч таксама паведаміў, што гаспадаркам раёна, якія ўваходзяць у ААТ «БНБК-Агра», дапамогу ў веснавых палявых работах будзе аказваць механізаваны атрад, створаны галаўным прадпрыемствам на базе машыннага двара вёскі Слабада. Для гэтых мэт набыта 6 энерганасычаных трактароў. Таксама робіцца стаўка і на іншую глебаапрацоўчую, пасяўную, корманарыхтоўчую тэхніку. Мехатрад ужо цалкам укамплектаваны механізатарскімі кадрамі. З 14 сакавіка сельгасарганізацыі пачнуць праходзіць тэхагляды — справіцца з гэтай работай у раёне разлічваюць за тыдзень-паўтара.
У веснавых работах будзе задзейнічана і новая тэхніка. У філіяле «Варатынь», да прыкладу, набылі машыну для ўнясення арганічных угнаенняў, у мінулым годзе нядрэнна абнавіўся сельгастэхнікай СВК «Гігант». У цэлым, па словах Аляксандра Каўраніна, тэхнікі ў раёне дастаткова, каб палявыя работы і сяўбу правесці ў агратэхнічныя тэрміны.
Зрэшты, першыя палявыя работы ўжо вось-вось пачнуцца. Пры ўсталяванні тэмпературы не ніжэй за нуль у поле выйдуць самаходныя машыны «Раса» — пачнецца падкормка калійнымі мінеральнымі ўгнаеннямі пасеваў азімай збажыны і рапсу.
Алена КАРПЕНКА. Фота носіць ілюстрацыйны характар.