Роля органаў тэрытарыяльнага грамадскага самакіравання ў сучасных умовах — выязны абласны семінар-нарада на гэтую тэму прайшоў сёння на базе Кіраўскага раёна. Удзел у мерапрыемстве прынялі старшыні раённых Саветаў дэпутатаў і прадстаўнікі калегіяльных органаў тэрытарыяльнага грамадскага самакіравання Бабруйскага, Быхаўскага, Кіраўскага, Клічаўскага і Асіповіцкага раёнаў. Ад нашага — старшыня райсавета дэпутатаў Геворг Мелканян, старшыні шэрагу сельсаветаў, старасты населеных пунктаў і інш. Узначаліла выязны семінар старшыня Магілёўскага абласнога Савета дэпутатаў Ірына Раінчык. 

Падчас семінара была абмеркавана практыка арганізацыі работы з органамі тэрытарыяльнага грамадскага самакіравання (вопытам падзялілася старшыня Кіраўскага райсавета дэпутатаў Алена Сакадынец). Цікавасць удзельнікаў выклікаў вопыт работы вулічнага камітэта №1 г. Кіраўска. Аб узаемадзеянні Маладзёжнага парламента пры Кіраўскім райсавеце дэпутатаў з органамі тэрытарыяльнага грамадскага самакіравання распавяла яго старшыня Наталля Валынцава. Былі абмеркаваны іншыя актуальныя пытанні. Галоўным жа пасылам да ўдзельнікаў семінару стала ўкараненне найбольш дзейсных форм работы з насельніцтвам для вырашэння праблемных пытанняў людзей, зацікаўлення жыхароў да актыўнасці ў грамадскім жыцці.

Алена КАРПЕНКА. Фота аўтара.