«Што можа быць сям’і даражэй?»
Гэтае пытанне стала тэмай для абмеркавання на сустрэчы прадстаўнікоў зацікаўленых службаў з бацькамі раёна, якая прайшла ў Цэнтры падтрымкі сям’і і мацярынства “Покрыва” ў Бабруйску і была арганізавана раённым сацыяльна-педагагічным цэнтрам.
Мэтай сустрэчы стала фарміраванне ў дарослых асэнсаваных адносін да бацькоўства праз прыцягненне іх увагі да каштоўнасцяў сям’і, значнасці сямейных традыцый і ўстановак. Менавіта на апошнім засяродзіў увагу, звярнуўшыся да аўдыторыі, настаяцель храма ў гонар Пакрова Прасвятой Багародзіцы іерэй Аляксій Палякоў. Ён заўважыў, што сям’я з’яўляецца асновай светабудовы і крыніцай любові і радасці для кожнага чалавека.
Псіхолаг Бабруйскай гарадской паліклінікі №1, Цэнтра падтрымкі сям’і і мацярынства “Покрыва” Алена Палавінка расказала пра бацькоўскія ўстаноўкі і іх ролю ў фарміраванні духоўна-маральных каштоўнасцяў у дзяцей. Дзякуючы ёй, дарослыя не толькі пачулі шмат карыснай інфармацыі, але і на практыцы зразумелі розніцу паміж выбарам метадаў выхавання дзяцей, усвядомілі значнасць павышэння свайго выхаваўчага патэнцыялу.
Людміла Патапенка, урач па медыцынскай прафілактыцы Бабруйскага занальнага цэнтра гігіены і эпідэміялогіі, прыцягнула ўвагу бацькоў да праблемы фарміравання ў непаўналетніх навыкаў уласнай гігіены, дала практычныя парады і рэкамендацыі адносна гэтага, адказала на хвалюючыя бацькоў пытанні. Тэму захавання здароўя, у тым ліку рэпрадуктыўнага, закранула ў сваім выступе ўрач-акушэр-гінеколаг БГП №2 Ганна Шэндрыкава.
Галіна Галацэвіч, загадчыца аддзялення сацыяльнай адаптацыі і рэабілітацыі і суправаджаемага пражывання Бабруйскага раённага цэнтра сацыяльнага абслугоўвання насельніцтва, давяла інфармацыю аб паслугах цэнтра па сацыяльнай падтрымцы сямей.
Пра галоўныя накірункі работы цэнтра “Покрыва” падчас экскурсіі распавяла Крысціна Навасёлава, намеснік дырэктара ўстановы. Яна пажадала бацькам захоўваць цеплыню сваіх сэрцаў, верыць у лепшае і выхоўваць дзяцей у радасці і дабрыні.
— Сустрэча прайшла ў цёплай, дабразычлівай атмасферы. Хочацца спадзявацца, што шчырыя ўсмешкі на тварах матуль, увага, з якой жанчыны ўспрымалі інфармацыю, — пацверджванне таго, што ўмацаванне сям’і — значная для іх тэма, а сама сям’я з’яўляецца крыніцай радасці, надзеі, самым каштоўным і незаменным у жыцці, — адзначыла дырэктар Бабруйскага раённага сацыяльна-педагагічнага цэнтра Наталля Ганчарова.
Алена КАРПЕНКА.