Год — новы, справы — старыя
Кругаварот спраў, характэрны для аграрнай галіны і сельгасвытворчасці ў прыватнасці, дазваляе ў новым годзе гаварыць на “старыя” тэмы — павелічэнне вытворчасці малака і мяса, падрыхтоўку сельгасарганізацый да веснавой сяўбы як асновы асноў усё той жа вытворчасці малака і мяса.
З упэўненасцю можна канстатаваць, што ў раёне працягваецца падрыхтоўка насеннага фонду да веснавой пасяўной. Па дадзеных упраўлення па сельскай гаспадарцы і харчаванні райвыканкама, ачышчана 983 тоны насення збажыны і зернебабовых раслін, што складае 85% ад патрэбы раёна. Цалкам завяршылі ачыстку насення ў філіяле “Варатынь” ААТ “БЗТДіА”, СВК “Гігант” і ААТ “Агракамбінат Бабруйскі”. На стадыі завяршэння гэтая работа ў філіяле “Харчавік-Агра” ААТ “Чырвоны харчавік АграСэрвіс”.
Працягваецца вывазка на палі арганічных угнаенняў. Вывезена на дадзеную пару 128 тысяч тон ці 48% ад патрэбы раёна. Найбольш актыўна гэтая работа вядзецца ў такіх сельгасарганізацыях як ААТ “Саўгас Кісялевічы” — вывезена 15 000 тон або 88% ад неабходнага; у філіяле “Харчавік-Агра” ААТ “Чырвоны харчавік АграСэрвіс” (16,3 тысячы тон, 71%) і ў ААТ “Агракамбінат Бабруйскі” — на палях знаходзіцца 22,5 тысяч тон арганікі або 50% ад плану гаспадаркі.
Уся ўвага ў сельгасарганізацыях таксама да рамонту тэхнікі, бо кожны разумее, што якасна падрыхтаваны машынна-трактарны парк — залог своечасовага правядзення пасяўной, а значыць — і добрага ўраджаю.
Алена КАРПЕНКА.
Здымак носіць ілюстрацыйны характар.