Выдатны настаўнік, чулы чалавек
Адукацыя Бабруйскага раёна багата на педагогаў, якія не толькі ўкладваюць у дзіцяці веды па тым ці іншым прадмеце, але вучаць маленькага чалавека быць чалавекам у шырокім сэнсе гэтага слова: паважаць сябе і іншых, шанаваць родных, заўважаць наўкол прыгожае, зберагаць спадчыну сям’і і народа, любіць вялікую і малую Радзіму. Вучаць спагадзе, чуласці, дабрыні ў дачыненні іншых людзей, усяго жывога, упартасці і настойлівасці ў рашэнні жыццёвых задач, дасягненні пастаўленых мэт. Настаўнікаў, якія з гатоўнасцю перадаюць уласны вопыт маладому пакаленню педагогаў, дбаючы, каб ланцужок прафесійнага майстэрства, якое некалі самі перанялі ад старэйшых калег, узбагацілі і адшліфавалі, не перарваўся.
Да ліку такіх педагогаў, без сумнення, належыць Ірына Эрыхаўна Сысоева, настаўнік пачатковых класаў Бортнікаўскай сярэдняй школы — пераможца першага этапа рэспубліканскага конкурсу “Настаўнік года Рэспублікі Беларусь”.
У дадзенай установе адукацыі Ірына Эрыхаўна працуе з 1999 года. Яна — настаўнік вышэйшай катэгорыі. За час работы зарэкамендавала сябе творчым педагогам.
— Пры арганізацыі адукацыйнага працэсу Ірына Эрыхаўна ўлічвае ўзроставыя, псіхалагічныя і індывідуальныя асаблівасці навучэнцаў. Выкарыстоўвае ў рабоце сучасныя методыкі навучання і адукацыйныя тэхналогіі: гульнёвую, здароўезберагальную, праектную. Вучыць дзяцей думаць, выказваць сваю думку, аналізаваць, рабіць вывады, закладвае асновы даследчай дзейнасці, — расказала пра педагога дырэктар установы адукацыі Ірына Валянцінаўна Нікалаева.
А яшчэ мы даведаліся, што Ірына Эрыхаўна — настаўнік, які не дазваляе сабе спыняцца на набытых ведах, сістэматычна працуе над павышэннем свайго майстэрства. З’яўляючыся кіраўніком школьнага метадычнага аб’яднання настаўнікаў і выхавацеляў ГПД, дзеліцца вопытам з калегамі. Яна прымае ўдзел у разнастайных конкурсах. З’яўляецца аўтарам творчых распрацовак: інтэрактыўны плакат “Усе свае” (інтэрактыўны бацькоўскі сход), інтэрактыўны плакат “Русский язык. 2 класс. Звуки и буквы”, інтэрактыўнае відэа “Вясёлае падарожжа”.
Ірына Эрыхаўна ўдзельнічае ў інавацыйным праекце “Укараненне мадэлі фарміравання метапрадметнай кампетэнтнасці навучэнцаў ва ўмовах інфарматызацыі адукацыі”. Засвоіла вучэбную праграму “Стварэнне электронных адукацыйных рэсурсаў сродкамі камп’ютарных і інтэрнэт тэхналогій”. І ўвогуле яна — добры і спагадлівы чалавек, які карыстаецца аўтарытэтам у калег, вучняў і іх бацькоў.
Алена КАРПЕНКА.