Вынікі сельскагаспадарчага года: лічбы, факты, віншаванні

Сёння — Дзень работнікаў сельскай гаспадаркі і перапрацоўчай галіны. Свята людзей, чые прафесійныя абавязкі напрамую звязаны з забеспячэннем харчовай бяспекі краіны і кожнага беларуса ў прыватнасці, што ў сённяшніх няпростых эканамічных умовах успрымаецца з асаблівай значнасцю. Вырошчваць хлеб, атрымліваць малако, мяса, яйкі, гатаваць з іх запатрабаваную ў шматлікіх краінах прадукцыю — на ўсё гэта цудоўна здольны вы, нашы землякі-хлебаробы і жывёлаводы: механізатары і вадзіцелі, аграномы і інжынеры, зааветспецыялісты, эканамісты, брыгадзіры, бухгалтары, юрысты… Усім вам не стамляемся казаць: “Вялікі дзякуй! Вы — гонар Бабруйшчыны і Беларусі!”. Час не стаіць на месцы. Узяўшы на ўзбраенне найноўшыя тэхналогіі, раённыя сельгасарганізацыі развіваюцца, садзейнічаючы развіццю ўсяго раёна. Да прафесійнага свята аграрная галіна падыйшла з добрымі вынікамі: высокімі ўраджаямі ў раслінаводстве, прыкметна павялічанымі вытворчымі паказчыкамі ў жывёлагадоўлі. Што дакладна ўдалося дасягнуць кожнаму сельскагаспадарчаму калектыву, расказваюць кіраўнікі, яны ж — натхняльнікі, арганізатары, менеджэры і кантралёры.

Васіль Пятровіч ЖУК, старшыня СВК “Гігант”:


— Радуе тое, што маем каманду спецыялістаў, працаздольны калектыў, гатовы рашаць пастаўленыя задачы, бачыць і вырашаць праблемы, без якіх на вытворчасці не абыходзіцца. І ўсё гэта дзеля трывалага выніку, стабільнага функцыянавання сельгаспрадпрыемства. Менавіта стабільныя вынікі — індыкатар таго, што ёсць каманда і яна зладжана працуе. Тэмп росту валавой прадукцыі ў супастаўных цэнах за студзень-кастрычнік склаў 112%, у тым ліку прадукцыя жывёлагадоўлі — 122,9%, раслінаводства — 106,5%. Атрымалі 8 868 тон зерня збажыны, павялічыўшы мінулагодні аб’ём на 1 407 тон (118,9%); накапалі 13 000 тон бульбы (118,6%). Вытворчасць буйной рагатай жывёлы за гэты перыяд склала 683,4 тоны (тэмп росту 146,5%), вытворчасць малака — 6 283,2 т ці 140,1%. За гэтымі лічбамі, паўтаруся, зладжаная работа калектыву і каманды спецыялістаў, якая ў чарговы раз не падвяла. Тыя задачы, што перад сабой ставілі, мы выканалі. Ураджай сабралі і паклалі на захаванне якасна і з мінімальнымі стратамі, што пацвярджае прафесіяналізм нашых працаўнікоў. Цяпер жа, улічыўшы недапрацоўкі сёлетняга года па падрыхтоўцы глебы, упэўнена рухаемся наперад, у гэтыя дні робім ужо задзел пад азімы рапс.

Марына Мікалаеўна АЎРАМЧЫК, намеснік дырэктара па сельскай гаспадарцы ААТ “БЗТДіА”:


— З настроем да прафесійнага свята падыйшлі добрым, і гэта — вынік напрацаванага. За 10 месяцаў павялічылі на 20 галоў дойны статак. Атрымалі 4 773 тоны зерня збожжавых і зернебабовых раслін, што на 13,4% болей за папярэдні год. Павялічылі на 3,4% аб’ём вытворчасці малака — надаілі з пачатку года 9 766 тон. Пры гэтым удой на адну галаву склаў 6 528 кілаграмаў, што на 108 болей, чым у адпаведным перыядзе мінулага года. Сярэднесутачны ўдой на рагулю, пераўзыйшоўшы мінулагодні паказчык, склаў 21,5 кілаграма. Дасягнута добрая таварнасць малака — 93,5%, што на 1,6% болей, чым у папярэднім годзе. Аб’ём рэалізацыі ў фізічнай вазе склаў 9 132 тоны або +5,2%. З іх гатункам экстра і вышэйшым — 99,99%. Павялічылі ў параўнанні з адпаведным перыядам 2021-га прыплод буйной рагатай жывёлы, атрымалі за 10 месяцаў 1 310 галоў.

Алі Малікавіч АХМЕДАЎ, дырэктар ААТ “Неўскі-Агра”:

— Жывем, жыццё цудоўнае, таму і настрой выдатны! А калі ў дачыненні сельскагаспадарчага года, то парадавала, што атрымалі болей, чым у папярэднім годзе, зерня збожжавых і зернебабовых — намалацілі 8 574 тоны або 133% да ўзроўню папярэдняга года. Болей накапалі бульбы — без малога тры тысячы тон ці 122,2% да мінулагодняга ўзроўню. Болей нарыхтавалі травянога корму для жывёлы — звыш 9 тысяч тон кармавых адзінак або 115% да 2021 года, што дае падставу разлічваць на лепшыя вынікі ў жывёлагадоўлі ў далейшым. У гэтай галіне ў нас не без праблем, але калектыў над імі напружана працуе і, упэўнены, вытворчыя паказчыкі мы і тут палепшым.

Андрэй Мікалаевіч СЦЯПАНАЎ, дырэктар ААТ “Міхалёўская Ніва”:

— Чым добрым адметны сёлетні год? Мы атрымалі вышэйшую, чым у папярэднім годзе, ураджайнасць зерневых і зернебабовых раслін (32,6
ц/га, тэмп росту 123%) і найперш — азімых. Асабліва парадаваў азімы ячмень — з аднаго круга ўзялі па 68 цэнтнераў. У цэлым намалацілі 7 750 тон зерня збажыны ці 134% у параўнанні да 2021 года. Дасягнулі вышэйшай, чым у мінулым сельскагаспадарчым сезоне, ураджайнасці цукровых буракоў — 305 ц/га ці 138% да папярэдняга года. Радуе, што забяспечылі жывёлу травяным кормам — на ўмоўную галаву нарыхтавалі 32,9 цэнтнера кармавых адзінак, што дае падставу разлічваць на нарошчванне аб’ёмаў вытворчасці жывёлагадоўчай прадукцыі.

Міхаіл Мікалаевіч СТРЫЖЭЎСКІ, дырэктар філіяла “Харчавік-Агра” ААТ “Чырвоны харчавік АграСэрвіс”:

— Што парадавала? Найперш — і гэта лічу галоўным — што прайшла небяспечная пандэмія кавіду, усе нашы людзі вярнуліся ў строй і радуюць сваёй працай. У дачыненні вытворчасці справы таксама, як лічу, складваюцца нядрэнна. Як і ў папярэднія гады, мы цалкам забяспечылі жывёлу травяным кормам — нарыхтавалі 35,5 цэнтнера кармавых адзінак на ўмоўную галаву. Маем добрыя вытворчыя вынікі ў жывёлагадоўлі — сярэднедзённы ўдой малака ад адной каровы складае 18,2 кілаграма, што вышэй мінулагодняга паказчыка. Разлічваем, што і ў цэлым па годзе на рагулю малака надоім болей, чым у 2021-м. Сказаць — на колькі, пакуль не бяруся. Наперадзе яшчэ не адзін працоўны дзень. Станоўчым лічу і тое, што вырасла выручка ад продажу прадукцыі, падрос заробак работнікаў

Яўген Аркадзьевіч БАКАЧ, дырэктар ААТ “Агракамбінат Бабруйскі”:

— Маючы канцэнтраваны корм (гаспадарка ў даверным кіраванні ААТ “БНБК-Агра”), мы змаглі некалькі павялічыць надоі малака і прывагі буйной рагатай жывёлы. Апошняе дасць магчымасць хутчэй атрымаць цёлачнае пагалоўе і паскорыць працэс атрымання малака, бо, каб мець патэнцыял для яго росту, патрабуецца маладняк. Узяліся за свінагадоўлю. Ужо набылі 100 галоў рамонтных свінак, у планах — яшчэ 200, якія пасля асемянення дадуць маладняк. Планаў для развіцця нямала. Да прыкладу, у наступным годзе маем намер аднавіць работу жывёлагадоўчага комп­лекса ў Дойнічава — рэканструяваўшы яго. Калі гаварыць пра раслінаводства, то сёлета было пасеяна небывала шмат (5 405 гектараў) кукурузы. Гэтым часам убіраем на зерне. Ураджайнасцю не пахвалішся, але прыкладваем усе намаганні: уздобілі глебу гліфасатамі, уносім мінеральныя ўгнаенні пад ворыва, назапашваем азотныя мінеральныя ўгнаенні, каб наступны год у гэтым плане стаў плённым. Пасеялі 2 000 гектараў азімай збажыны. Актыўна займаемся падняццем зябліва (паднята палова ад неабходных амаль трох тысяч гектараў), каб увесну без правалокі ўключыцца ў сяўбу.

Валерый Аляксандравіч СЯРГЕЙЧЫК, дырэктар ААТ “Саўгас Кісялевічы”:

— Падыйшлі да Дня сельскай гаспадаркі з выдатным настроем! Дасягнута ўдвая большая ўра­джайнасць раслін, чым у мінулым годзе — найперш гэта датычыцца кукурузы. Ужо атрымалі больш за
2 000 тон кукурузнага зерня, плюс да гэтага намалацілі 800 тон зерня збажыны. Нарыхтавалі небывалыя дагэтуль аб’ёмы травянога корму: сена, сіласу і сенажу — больш за 59 цэнтнераў кармавых адзінак на ўмоўную галаву жывёлы, што з’яўляецца найвышэйшым паказчыкам у раёне. Маем добрыя сярэднемесячныя прывагі ў жывёлагадоўлі: на вырошчванні буйной рагатай жывёлы — звыш 700 грам, на адкорме — у межах 1 кілаграма. У мэтах паляпшэння ўмоў утрымання жывёлы сёлета правялі рэканструкцыю двух цялятнікаў: у вёсках Пад’ясенка і Раксалянка. Своечасова, з улікам усіх тэхналагічных патрабаванняў заклалі ўраджай будучага года — пасеялі 750 гектараў азімай збажыны на зерне і 50 га зернеўкоснага жыта на зялёны корм. Паказчыкам таго, што вынікова папрацавалі, з’яўляецца прыкметна ўзросшая заробная плата работнікаў.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.