Кіраўнік раёна Аляксандр Сухадольскі павіншаваў экіпажы-тысячнікі

Намалоту зерня ў тысячу і болей тон па стане на раніцу панядзелка дасягнулі ў раёне адразу тры экіпажы зернеўборачных камбайнаў. Гэта камбайнер Алег Уладзіміравіч Вяроўкін з памочнікам камбайнера Максімам Аляксандравічам Быкавым (СВК “Гігант”), а таксама Аляксандр Уладзіміравіч Талкачоў з Дзянісам Уладзіміравічам Бутыліным і Дзмітрый Аляксандравіч Талкачоў (працуе без памочніка) з філіяла “Варатынь” ААТ “БЗТДіА”.

Прыбавілася, па стане на панядзелак, і вадзіцеляў-тысячнікаў. Імі сталі Уладзімір Рыгоравіч Сакалоў і Уладзімір Леанідавіч Дзяшчэня з філіяла “Варатынь”, а таксама вадзіцель ААТ “Міхалёўская Ніва” Леанід Уладзіміравіч Шкрадзюк.    

Выказваючы хлебаробам-перадавікам словы падзякі за плённую працу, старшыня Бабруйскага райвыканкама Аляксандр Сухадольскі засяродзіў увагу на значнасці іх справы для краіны і жыхароў раёна, пажадаў удзельнікам жніва моцнага здароўя, спрыяльнага надвор’я, дасягнення новых вытворчых перамог. З пажаданнем цудоўнага настрою на працу, лістамі ўдзячнасці і каштоўнымі падарункамі ад Бабруйскай раённай прафсаюзнай арганізацыі работнікаў аграпрамысловага комплексу да перадавых механізатараў і вадзіцеляў звярнуліся старшыня раённага аб’яднання прафсаюзаў Віталь Сідзюк і старшыня райкама прафсаюза работнікаў АПК Надзея Дудаль, кіраўнікі сельгаспрадпрыемстваў, дзе адзначаны экіпажы-тысячнікі: старшыня “Гіганта” Васіль Жук і кіраўнік філіяла “Варатынь” Аляксандр Трафімаў, а таксама лідары прафсаюзных пярвічак АПК, якія знайшлі, чым парадаваць работнікаў-прафесіяналаў.   

У “Гіганце”, да слова сказаць, ураджайнасць азімай пшаніцы, якую гэтым часам убіраюць, — 75 цэнтнераў з гектара. І гэта, са слоў Васіля Жука, не мяжа: ёсць палі, якія дадуць і болей — па 85 ц/га.

— Ураджай ёсць, жаданне працаваць таксама, умовы ўдзельнікам жніва створаны. Таму аператыўна ўбіраем і марым толькі, каб не падвяло надвор’е. Што ў аснове ўраджаю? Праца. Праца і жаданне людзей быць ацэненымі — гэта сёння вызначае поспех прадпрыемства. А яшчэ надвор’е — яно сёлета сапраўды пасадзейнічала.   

Старшыня райвыканкама Аляксандр Сухадольскі, даючы ацэнку ўборачнай кампаніі ў цэлым, заўважыў, што ў раёне ўбрана палова плошчаў, якія былі заняты пад збажыну і зернебабовыя. Якім будзе раённы каравай, казаць пакуль рана, аднак ураджайнасць на гэтую пару перавышае мінулагоднюю, і гэта радуе.

— Уборка хлябоў праходзіць зладжана — усе экіпажы працуюць, ніхто не прастойвае. Трымя камбайнамі нам дапамагаў Горацкі раён, таму хутка і мы ім дапаможам: узаемавыручка павінна быць. Прыемна вітаць камбайнераў-тысячнікаў. Можа, крыху і запознена, ды стрымлівала надвор’е. Але ж, упэўнены, з задачай своечасова справімся: зерне добрае, вільготнасць адпавядаючая, — адзначыў кіраўнік раёна.

Алена КАРПЕНКА. Фота Юрыя ЮРКЕВІЧА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.