Летняя занятасць школьнікаў прадугледжвае не толькі адпачынак і аздараўленне, але і магчымасць папрацаваць, і зарабіць грошай.

Узяўшы апошняе на ўзбраенне, на базе Варатынскай сярэдняй школы, пад эгідай Бабруйскага РК ГА “БРСМ”, стварылі працоўны сельскагаспадарчы атрад імя Героя Савецкага Саюза Сцяпана Фёдаравіча Шутава. Члены атрада — чатырнаццаць хлопчыкаў і дзяўчынак 8-10-х класаў на чале з камандзірам атрада Аляксандрам Чарновым і педагогамі-суправаджатымі Міхаілам Аляксандравічам Рыняком і Святланай Паўлаўнай Белаградскай з задавальненнем займаюцца відавой праполкай пасеваў збажыны на палях філіяла “Варатынь” ААТ “БЗТДіА”, прывядзеннем у парадак складскіх памяшканняў для захавання зерня.

Сваё дзеянне атрад пачаў 6 ліпеня і будзе доўжыцца да 26-га гэтага месяца. Працягласць рабочага дня школьнікаў складае 4 гадзіны. За гэты час, вядома ж, можна і стаміцца, але настрой на працу, як нас запэўнілі, у школьнікаў выдатны, тым болей што наперадзе — заробная плата.

Алена КАРПЕНКА. Фота з архіва Варатынскай СШ.