Дыпломы — за ўдзел у рэспубліканскім фестывалі
Сямейны вакальны ансамбль Грыгор’евых з Бабруйшчыны прадставіў Магілёўскую вобласць на VI Рэспубліканскім фестывалі сямейнай творчасці “Жывіце ў радасці”, які прайшоў 13-15 мая ў Слоніме Гродзенскай вобласці.
Па выніках творчага конкурсу, у намінацыі “харавое мастацтва”, ён узнагароджаны Дыпломам Міністэрства культуры Рэспублікі Беларусь, упраўлення культуры Гродзенскага аблвыканкама, Слонімскага райвыканкама і каштоўным падарункам — за пераемнасць і захаванне сямейных традыцый.
Непахіснае жаданне чараваць гледача сваім мастацтвам і любоўю да песні стала для сям’і Грыгор’евых асновай жыцця і творчасці. Сямейны вакальны ансамбль існуе з 2019 года. У яго склад уваходзяць Валянціна Грыгор’ева (кіраўнік народнага ансамбля народнай песні “Пярэзвы” раённага Цэнтра культуры), яе дачка Вольга Забашняя (кіраўнік дзіцячай эстраднай студыі РЦК), унучкі Алеся і Вера. Зрэшты, Алеся ўдастоена спецыяльнага дыплома і каштоўнага падарунка як самы юны ўдзельнік фэста.
— Ад удзелу ў рэспубліканскім фестывалі ўражанняў атрымалі безліч і ўсе прыемныя, — дзеліцца Валянціна Грыгор’ева. — Па-першае, жылі ў цудоўным месцы — аграгарадку Жыровічы. Па-другое, надзвычай насычанай была праграма: гэта і сам конкурс, і экскурсія ў Свята-Успенскі Жыровіцкі манастыр, прагляд спектакля “Прымакі” ў Слонімскім драматычным тэатры, наведванне выставы “Творчая майстэрня сямейнага дабрабыту”, канцэрты з удзелам харэаграфічнага дзяржаўнага ансамбля “Белыя росы”, сямейнага дуэта ТЭО і Вольгі Рыжыкавай. Дый, увогуле, цудоўным было правесці час разам з сям’ёй, у прыгожым месцы, сярод людзей, ахопленых, як і мы, творчым натхненнем і любоўю да песні.
Запісала Алена КАРПЕНКА.
Фота з сямейнага архіва Грыгор’евых.