Найбольш актыўныя члены Бабруйскай раённай арганізацыі Беларускага таварыства інвалідаў, якую ўзначальвае Любоў Шушлянікава, сабраліся сёння ў раённым краязнаўчым музеі ў Сычкава. Паўдзельнічалі ў закрытым паказе адкрыцця тыдня выставы работ дэкаратыўна-прыкладной творчасці (вязанне, вышыўка) членаў раённай арганізацыі інвалідаў — Таццяны Навіцкай і Раісы Акуліч. Пазнаёміліся з выставачнай залай музея, заламі Вялікай Айчыннай вайны, гісторыі Бабруйскага раёна, этнаграфіі, пра якія цікава і змястоўна распавяла дырэктар установы Вольга Гарбунова.

Там жа члены раённай арганізацыі пры ўдзеле старшыні Магілёўскай абласной арганізацыі Беларускага таварыства інвалідаў Алесі Цумаравай і начальніка аддзела ідэалагічнай работы, культуры і па справах моладзі райвыканкама Дзмітрыя Вяроўкіна правялі сход, абмеркавалі дзейнасць арганізацыі на працягу апошніх год, а таксама надзённыя пытанні і шляхі іх вырашэння.  

І Алеся Цумарава, і Дзмітрый Вяроўкін, а таксама старшыня Сычкаўскага сельвыканкама Зінаіда Трубачка пажадалі людзям з абмежаванымі магчымасцямі здароўя, творчых поспехаў, станоўчых уражанняў, якія расквечваюць жыццё, напаўняюць яго сэнсам. Заклікалі берагчы сябе ва ўмовах каронавіруса — паклапаціцца пра прышчэпку ад небяспечнай хваробы, павіншавалі з надыходзячымі навагоднімі святамі.  

Алена КАРПЕНКА. Фота Юрыя ЮРКЕВІЧА.