У ААТ “Саўгас Кісялевічы” прыступілі да ўборкі кукурузы на зерне. Гаварыць пра ўраджайнасць, па словах дырэктара Валерыя Аляксандравіча Сяргейчыка, пакуль рана: убраны нязначныя плошчы — па стане на раніцу панядзелка 20 гектараў са 150 адведзеных на гэтыя мэты.

Атрыманы ўраджай збіраюцца выкарыстаць часткова на корм жывёле, часткова разлічыцца зернем за прыдбаныя мінеральныя ўгнаенні. Кукуруза на сілас, як і ў большасці раённых сельгасарганізацый, тут ужо ўбрана — зялёная маса сёлета парадавала. Дзякуючы чаму травянога корму на ўмоўную галаву жывёлы нарыхтавана 36,7 ц к. адз. — найвышэйшы паказчык у раёне. Прычым, аб’ёмы нарыхтаванага пераўзышлі планавыя лічбы. У прыватнасці, сіласу занатавана 7078 тон або 121% да задання, сена — 840 тон (240%), сенажу 6300 тон (100%). Акрамя гэтага ў гаспадарцы заняты падняццем зябліва.

***

У КСУП “Хімы-Агра” збор кукурузнай масы завершаны, кукурузнага зерня — у пачатку. На гэтыя мэты, як адзначыў галоўны аграном Андрэй Рыгоравіч Чорны, стаіць задача ўбраць каля 100 гектараў пло­шчаў. Атрыманае зерне пастаўляюць на Бабруйскі КХП на дапрацоўку. У выніку частку ўраджаю плануюць заплюшчыць на корм жывёле, яшчэ адну — рэалізаваць.

Між тым, уборка кукурузы — не адзінае, чым заняты на гэтую пару аграрыі “Хімоў-Агра”. Актыўна звозяць з палёў запрэсаваную салому, займаюцца восеньскім ворывам, вывазкай арганічных угнаенняў на бліжэйшыя да ферм палі.

***

У ААТ “Міхалёўская Ніва”, як расказала дырэктар Алена Васільеўна Пацыенка, работ на палях багата. Працягваецца ўборка цукровых буракоў, ураджай якіх, па словах кіраўніка, атрымалі з-за замокласці ніжэйшы за чаканы.

Актыўна вядзецца ўборка кукурузы на сілас і зерне, якую да першага лістапада тут плануюць цалкам завяршыць. Ураджай кукурузнай масы атрымалі добры, што дазволіла зрабіць неблагі запас сіласу на зімоўку (на ўмоўную галаву жывёлы нарыхтавана 30 ц к. адз. травянога корму), ураджай зерня — 48 ц/га. На апошняе, як тут адзначылі, паўплывалі ў тым ліку невысокаўраджайныя гатункі культуры. Зерне кукурузы заплюшчылі і праз 21 дзень збіраюцца выкарыстаць на корм жывёле.

Як у іншых сельгасарганізацыях, у “Міхалёўскай Ніве” займаюцца падняццем зябліва, каб вызваліць час увесну — адразу уключыцца ў сяўбу.

***

У ААТ “Стасеўка”, як паведаміў дырэктар Аляксандр Васільевіч Трафімаў, гэтай парой пракладваюць восеньскае ворыва. Праўда, яшчэ не скончаны і ўборачныя работы — на палях застаюцца 54 гектары кукурузы на зерне (на сілас убралі). Вырашаецца пытанне па дапрацоўцы ўраджаю, сама гаспадарка такіх магчымасцяў не мае.

***

Усяго ж, па дадзеных райсельгасхарчу на 26 кастрычніка, кукуруза на зерне ў раёне ўбрана на плошчы 988 гектараў або 48% ад патрэбы, намалочана 6105 тон пры сярэдняй ураджайнасці 62 ц/га. У лідарах па ўраджайнасці СВК “Гігант” 85 ц/га (намалочана 3000 тон), другі па велічыні паказчык — у ААТ “Неўскі-Агра” — 76,3 ц/га (923 т).

Алена КАРПЕНКА. Фота носіць ілюстрацыйны характар.